A CORUÑA | AEROPORTO
O BNG urxe manter os postos de traballo na torre de control de Alvedro
MADRID | O BNG vén de rexistrar novas
iniciativas sobre o fechamento da torre de control do aeroporto de Alvedro, na
Coruña, e o traslado do control de tráfico á torre de Vigo. A organización
nacionalista reclama manter o apoio dos sistemas visuais para unha maior
seguridade aérea e actuar de maneira áxil ante erros técnicos ou sabotaxes. Así
mesmo, urxe garantir as condicións laborais e salariais dignas aos traballadores
e traballadores nas torres privatizadas e evitar recortes de persoal.
Tanto a torre de control de
Alvedro como a de Peinador foron privatizadas e atópanse xestionadas pola mesma
empresa, SAERCO. A privatización supuxo unha alarmante redución dos dereitos
laborais e salariais nos últimos anos, xerando graves diferenzas de trato
frente os que seguen exercendo as súas funcións en torres de control públicas
dependentes de AENA. Este empeoramento das condicións implica tamén un incremento
do risco na seguridade do tráfico tal e como denuncian os propios
controladores.
Co remate da construción da torre
de control multifunción no aeroporto de Peinador, en Vigo, esta instalación
pasaría a controlar o tráfico aéreo de distintos aeroportos, incluíndo o
control do tráfico aéreo do aeroporto da Coruña en remoto. A pesar de que se
están estendendo os sistemas de control remoto, o certo é que “algúns países
cancelaron a súa implantación por considerarse preciso contar co apoio de
sistemas visuais para contrarrestas posíbeis fallos técnicos ou sabotaxes”.
“Cremos que o Goberno do Estado
debe actuar para garantir a continuidade dos postos de traballo e as condicións
laborais dos controladores aéreos que traballan nestas torres de control. Aínda
que se aposte polo control remoto, será necesario seguir contando con persoal
técnico de maneira presencial en Alvedro para poder atallar de forma áxil
calquera avaría ou fallo nos sistemas” explica o deputado do BNG, Néstor Rego.
Resulta evidente que “o
fechamento da torre de Alvedro porá en risco os postos de traballo agora
existentes nestas instalacións”. A perda de empregos estábeis e de calidade “non
debe tolerarse, e moito menos, cando esa redución pode actuar, ademais, en
detrimento de a calidade e seguridade dos servizos de control aéreo”. Departamento de comunicación