FERROL
O BNG reclama a cesión gratuíta ao Concello dos terreos da Autoridade Portuaria en Ferrol
MADRID | O deputado do BNG no Congreso,
Néstor Rego, rexistra iniciativas na cámara baixa para que o Ministerio de
Transportes, Mobilidade e Axenda Urbana ceda de maneira gratuíta ao Concello de
Ferrol os terreos, propiedade da Autoridade Portuaria, que se encontran desafectados
de usos portuarios. A día de hoxe é a administración local a que corre con
todos os gastos de mantemento e conservación deste espazo mais a Autoridade
Portuaria pretende lucrarse economicamente a través do cobro de taxas pola súa
ocupación.
O Concello de Ferrol era titular
das dúas concesións na zona de servizo do Porto de Ferrol para uso público na
Malata e pasa uso deportivo. Ambas as dúas foron outorgadas en 1990 até 2020. Nestes
espazos cedidos, o concello realizou diversas melloras e investimentos públicos
destinados a equipamentos deportivos, saneamento, zonas verdes, aparcamentos
públicos realizados durante os máis de 30 anos de duración da concesión.
“Os terreos, titularidade de
Portos do Estado, hoxe en día están desafectados de usos portuarios” explica o
deputado do BNG no Congreso. Son terreos que, aínda que se encontran dentro da zona
de servizo portuaria, por causa da evolución das necesidades operativas dos
tráficos portuarios, quedaron en desuso ou perderon a súa idoneidade e
funcionalidade técnica para a actividade portuaria. “Agora, co remate da
concesión, as estradas abertas de uso público, as vías de acceso rodado á
cidade, os equipamentos públicos comunitarios, todas as infraestruturas que
habilitou o concello nesta área e que son indispensábeis para Ferrol,
reverteron á Autoridade Portuaria, que pretende cobrar taxas polo seu uso,
cando son terreos que deberan quedar claramente en mans municipais” sinala a
organización nacionalista.
A pesar disto, os terreos “seguen
sen ser cedidos definitivamente e de maneira gratuíta ao Concello de Ferrol que
é quen leva anos facendo uso e mantendo en condicións adecuadas os equipamentos
neles construídos”. Por este motivo, o deputado do BNG reclama a súa cesión de
maneira gratuíta “con carácter urxente” para rematar cos graves prexuízos que
está supondo este atraso.
“Non só está a causar un grave
prexuízo á cidade de Ferrol, senón que tamén está a causar incontábeis
problemas administrativos a clubs e entidades, sobre todo de carácter
deportivo, que fan uso diario das instalacións” enfatiza o deputado do BNG.
Rego pon como exemplo a situación
en que se encontra o club de fútbol da cidade, o Racing Club de Ferrol S.A.D,
ao que o concello non pode cederlle o uso do estadio municipal por non ser o
titular dos terreos onde se asenta e que vén usando ininterrompidamente desde a
súa inauguración no ano 1993. “A Autoridade Portuaria de Ferrol non pode exixir
ao concello o pago dunha taxa de ocupación anual que, mesmo coas bonificacións aplicábeis,
supera os 300.000 euros só pola utilización dos terreos onde se asenta o campo
municipal de fútbol da Malata” recrimina
Rego. Departamento de comunicación