CERCANÍAS FERROVIARIAS
O BNG reclama cercanías ferroviarias para a área da Coruña
.jpg&x=305)
A CORUÑA | O Bloque Nacionalista Galego presenta na Coruña, a campaña “Queremos
tren” coa presenza do deputado do BNG no Congreso, Néstor Rego, acompañado polo
Responsábel Comarcal, Daniel Carballada, e o voceiro municipal do BNG,
Francisco Jorquera e a concelleira Avia González. A organización nacionalista
demanda ao Goberno do Estado implantar o servizo de proximidade na área
metropolitana, así como no resto de áreas urbanas da Galiza. Defende o
ferrocarril como medio de transporte “eficaz, eficiente e sustentábel” e aposta
pola modernización tanto das infraestruturas, así como dos servizos
ferroviarios no País.
Dentro da campaña “Queremos tren” inclúese tamén a
demanda para a implantación dos servizos de cercanías de Renfe na Galiza, unha
das poucas comunidades que carece deste servizo na actualidade. “Hai cidades
máis pequenas no Estado español que si teñen este tipo de servizos, en cambio,
áreas urbanas de 400.000 habitantes como a da Coruña que non a teñen. Isto é
unha mostra de abandono dos servizos ferroviarios no noso País” denuncia o
deputado Néstor Rego.
O voceiro no Congreso lembrou que a propia Ministra de
Transportes, en resposta a unha pregunta oral do BNG, atreveuse a dicir que na
Galiza aínda que non existen propiamente servizos de proximidade, os de media
distancia facían esa función. “Isto é absolutamente falso, pois todos sabemos
que os servizos de cercanías implican traxectos específicos de curta distancia,
horarios máis frecuentes e tarifas máis baratas. Ningunha destas cousas existe
nas áreas urbanas da Galiza” subliña Rego.
O BNG considera unha urxente necesidade apostar pola
implantación este servizos para áreas urbanas como A Coruña que conta con un
importante número de concellos moi poboados e que contan xa, ademais, cunha
infraestrutura existente “que sería moi doado reconverter par o seu uso como
cercanías, e permitiría un transporte limpo, sustentábel e eficiente, aliviando
a intensidade de tránsito da entrada e saída da Coruña de vehículos
particulares”. Rego anuncia que o BNG non vai renunciar a este obxectivo, e que
seguirán traballando tanto socialmente como nas institucións para que Galiza
conte cuns servizos ferroviarios modernos, áxiles e adaptados á mobilidade do
século XXI.
Na súas declaracións, o voceiro municipal, Francisco
Jorquera, congratulou ironicamente a presenza na cidade da Coruña da Ministra
de Transportes para anunciar a licitación da obra para o acceso ferroviario co
porto exterior: “non foi sen tempo”. Formula a visita da Ministra como unha
“oportunidade de ouro” para que a alcaldesa da cidade demande “a condonación da
débeda do porto da Coruña ou unha solución equivalente para que o Estado
contribúa cunha cantidade equivalente á débeda que ten contraída o porto e
transformar o porto interior da Coruña”. Isto suporía evitar calquera tentación
especulativa cos terreos do porto interior da Coruña e “evitar a hipoteca que
esa débeda representa para a cidade”.
Así mesmo, sinala a implantación do servizo
ferroviario de proximidade tamén como unha oportunidade para conectar “co
Campus Universitario, cos polígonos industriais e mesmo co propio corazón da
cidade se se aproveitan as vías existentes no porto”. De facto, explica que xa
existen infraestruturas idóneas para implantar o servizo que contrarrestaría o
fluxo de máis de 100.00 vehículos que diariamente entran e saen da cidade.
“É un modelo de transporte máis social e asumíbel para
todas as persoas, independentemente da súa condición económica e social. Tamén
é un medio de transporte que ten menor impacto medioambiental” conclúe
Jorquera. Departamento de comunicación