LUGO
Lugo ten un novo festival de referencia: De Perdidos ao Miño
O Concello fomenta na Xuventude o respecto á diversidade sexual.
LUGO | Lugo
acolleu esta xornada a celebración dun festival pioneiro en Galicia
que, segundo o Concello de Lugo, organizador do evento, chega coa
vocación de ser un referente na concienciación entre a Xuventude en prol
do respecto á diversidade sexual.
“Un
punto de encontro, de carácter lúdico, co que pretendemos crear un
espazo para que a mocidade reflexione e no que figuras dunha gran
traxectoria profesional con moitos seguidores e seguidoras,
especialmente entre a rapazada, abordarán aspectos como a igualdade e a
inclusión”, destacou o edil Mauricio Repetto.
A
cita, que ten vocación de continuidade, celebrouse, favorecida pola boa
climatoloxía, cunha gran asistencia de público no paseo do Miño. Un
espazo actualmente en transformación onde conflúen varios dos grandes
proxectos postos en marcha pola alcaldesa, Lara Méndez, durante o seu
mandato, como son os relacionados coa mellora da conectividade entre a
cidade e o río (a través pasarela Tanxurela, a peonalización da Calzada
da Ponte e a ampliación do paso soterrado – ámbalas dúas en obras, a
mellora do Camiño Primitivo ou a creación do Carril Bici que cohesiona a
cidade coa contorna fluvial) e o aproveitamento dos seus usos (as
Caldas, a rexeneración do paseo da Fábrica da Luz ou creación dunha
plataforma de baño público nas inmediacións e o acondicionamento dos
parques infantís lindeiros, etc).
“A
nosa intención – sinalou a rexedora que non se quixo perder esta
primeira edición de Perdidos ao Miño – é achegarlle ás novas xeracións
valores sociais que combatan calquera tipo de prexuízo, traballando así
en favor da tolerancia, da convivencia e da igualdade de oportunidades.
Facémolo, ademais, nun espazo privilexiado no que dende o Goberno local
estamos traballando para poñelo en valor e acadar que se incorpore como unha localización preferente dentro dos hábitos de socialización
da cidadanía, con máis e mellores dotacións que serán un revulsivo para
o municipio dende o punto de vista económico pero tamén turístico.
Actuacións que, como este festival, e como no seu día xurdiu o Caudal
Fest, se converterán noutro importante atractivo de Lugo e, neste caso,
cun compoñente engadido de sensibilización entre a poboación máis nova”, afirmou Lara Méndez.
Neste
primeiro festival participaron, entre outros convidados, Carolina
Iglesias, cómica, guionista e youtuber galega, recoñecida no 2021 co
Premio Marcela e Elisa polo seu traballo a favor dos dereitos LGTBI+,
sendo a persoa máis nova en recibir este galardón, e gañadora dun Premio
Ondas polo seu podcast 'Estirando o chicle'.
A
psicóloga María González Da Rivera; Noemí Díaz Vázquez, profesora
lesbiana visible de Bioloxía e Xeoloxía, integrante da Rede Educativa de
Apoio LGBTI+ de Galicia e colaboradora de diarios nacionais; Marta
Herráiz, fundadora de LesWorking, a primeira rede profesional
internacional para mulleres lesbianas e codirectora xeral de REDI, a
rede empresarial pola diversidade e inclusión LGBTI en España; Luis
Arean, xornalista e membro fundador do Grupo de Minorías Sexuais de
Amnistía Internacional España, e Xácia Ceive, norteamericana transexual
asentada en Galicia e creadora do proxecto Sete Outeiros.
Un cartel de primeiro nivel que
se entregou ao público no debate de temas como a orientación sexual e a
identidade de xénero ao tempo que deron a coñecer as súas propias
experiencias persoais explicando, alén, o que signfica para eles e elas a
súa opción de vida emocional, sexual ou afectiva. Unha exposición que tivo como broche de ouro final a actuación en directo da DJ residente na sala BLOOM de Santiago, RIQUINHA. Departamento de comunicación