Deluxe, Siniestro Total e Happy Mondays ofrecerán un concerto gratuíto nos Xardíns de Méndez Núñez o vindeiro 19 de xuño para concluír a festa de inauguración da tenda de Fnac na Coruña. Abrirá o programa o galego Deluxe. Xoel López tocará algúns temas do seu último disco, "Fin de un viaje infinito". A continuación, a banda de Manchester Happy Mondays, que se converteu nos anos 80 e 90 nun dos grupos indie máis famosos, presentará o seu traballo máis recente. Pechará a velada a veterana banda viguesa Siniestro Total con algúns dos seus grandes éxitos. Apadrinada pola cantante de Madredeus, Teresa Salgueiro, e o artista multimedia Antón Reixa, a inauguración da Fnac na Coruña comezará co corte de cinta na tenda que se situará na Praza de Lugo. A distribuidora francesa de discos, libros, películas e outros produtos culturais disporá dunha instalación de máis de 2.500 metros cadrados distribuídos en dous andares na cidade herculina.