DEPUTACIÓN DA CORUÑA
A Deputación destina 704.000 euros para reactivar o sector das orquestras e verbenas en Galicia tras a pandemia
A presentación de solicitudes para os concellos permanecerá aberta ata o 30 de xuño ás 14.00 horas.
A CORUÑA | O presidente da Deputación da
Coruña, Valentín González Formoso, presentou hoxe a nova liña de axudas
provincial para reactivar o sector das orquestras e verbenas en Galicia, dotada
de 704.000 euros e dirixida a que os concellos da provincia de menos de 50.000
habitantes poidan contratar directamente a orquestras e/ou subvencionar ás
comisións de festas para a súa contratación.
No acto de presentación desta liña extraordinaria
de axudas que se enmarca dentro do Plan de Emprego Local (PEL) tamén estiveron
presentes o portavoz do goberno provincial, Bernardo Fernández; o deputado
Ángel García Seoane, e o representante de OTAVI (Asociación de Orquestras
Tradicionais ao Vivo) e responsable da Oca Band, Dani Dopazo, ademais doutros cantantes
e músicos de coñecidas orquestras galegas como a París de Noia, Los Satélites,
ou Metrópolis e o representante de Gaias Eventos, Luís Soto, que asistiron como
público.
Na súa intervención, Formoso destacou
“a dimensión económica dunha actividade na que Galicia se sitúa á vangarda de
España, xa que xera 5.000 empregos e factura preto de 30 millóns de euros, o
70% da facturación do sector en toda España”. O presidente provincial tamén
subliñou o “arraigo e a tradición que este sector ten en Galicia, cunha
estrutura estable e organizada conformada por ao redor de 300 orquestras, entre
as que se atopan algunhas das máis importantes do país, que xiran por todo o
Estado”.
“Nos 313 concellos galegos hai 3.000
comisións de festas, case tantas como parroquias e cada ano hai 2.400 festas e
máis de 5.000 actuacións ”, salientou, “por iso, a través desta liña de axudas
continúamos co noso compromiso coa reactivación económica” tamén cun sector
“que se viu paralizado durante a pandemia” e que tivo problemas para acceder
aos ERTEs que beneficiaron a outro sectores profesionais.
Formoso lembrou que a Deputación da
Coruña destinou máis de 30 millóns de euros en axudas directas aos sectores
máis afectados pola pandemia e pola guerra de Ucraína, 25 millóns a través dos
programas PEL Reactiva, dirixidoa a comercios, pemes, negocios, hostalería e
axencias de viaxe, e 5 millóns de euros este mesmo ano para o programa de
axudas ao sector do transporte, agrogandeiro e pesca”.
Pola súa parte, o portavoz do Goberno
provincial, Bernardo Fernández, fixo referencia a que con esta liña de axudas
“non se bota unha man só ás orquestras senón tamén aos múltiples sectores que
teñen relación coa verbena e as festas populares. Hai que sumar o impacto
económico que teñen para a hostalería e restauración, atraccións de feira,
pirotecnia, carpas... e para outros sectores locais ao congregar en moitos
casos a milleiros de persoas”. Fernández apuntou que segundo un estudo
realizado pola Asociación de Orquestras Tradicionais ao Vivo (OTAVI), o sector
das festas populares move máis de 300 millóns ao ano contando coas atraccións
de feira, carpas, restauración ou pirotecnia, uns números nos que tamén incide
o estudo do profesor Xaime Fandiño da
Universidade de Santiago sobre o importante impacto económico do sector na nosa
comunidade.
O portavoz de OTAVI, Dani Dopazo
quixo agradecer o apoio da Deputación: “estamos emocionados, para nós hai un
antes e un despois de hoxe. Ogallá outras administracións collan o guante xa
que se entre todos coidamos as festas galegas con un selo de calidade a todos
nos vai ir moito mellor”.
Por último, Ángel García Seoane
quixo poñer de relevancia o papel das comisións de festas, que se verán
beneficiadas destas axudas. “Non pode haber festas en Galicia se non se mima as
comisións de festas. Non son empresarios, son veciños que fan un esforzo
titánico para facer a festa do seu pobo. Iso non se pode ignorar, a Xunta non
pode ignoralo e se sigue por aí van a desaparecer porque non as podemos manter
só os concellos”.
Axudas que van
desde os 3.000 aos 15.000 euros
Os 90 concellos coruñeses de menos
de 50.000 habitantes (todos agás as grandes cidades) poderán solicitar, como
máximo, a contía do módulo que lles corresponda, en función da porcentaxe
resultante de dividir o número de habitantes do concello entre o número total
de habitantes nos concellos de menos de 50.000 habitantes da provincia, supoñendo
así axudas que van desde os 3.000 aos 15.000 euros, en función da súa
poboación.
Os gastos
subvencionables son os correspondentes ao importe do gasto previsto para a
contratación directa polo concello de orquestras que cumpran os requisitos
establecidos nestas bases e os gastos previstos como subvencións a comisións
organizadoras de festas populares e tradicionais para a contratación de
orquestras que cumpran os requisitos establecidos. Entre estes requisitos están
que as formacións musicais fagan música en directo, teñan máis de dous anos de
antigüidade e unha composición mínima de seis membros, dos que catro deberán
ser músicos e tocar algún instrumento.
As actividades
obxecto deste programa deben realizarse ata o 31 de decembro de 2022, polo que
as contratacións das orquestras poderán realizarse dentro deste período.
A presentación de solicitudes para os concellos permanecerá aberta ata o 30
de xuño ás 14.00 horas e realizarase de
xeito telemático, a través da plataforma SUBTeL da Deputación / Departamento de comunicación