DEPUTACIÓN DA CORUÑA
Formoso destaca a "misión fundamental" da Fiscalía Europea para loitar contra o fraude transnacional
A CORUÑA | O presidente da Deputación da Coruña, Valentín González
Formoso, participou hoxe na apertura da Escola de Verán do Ministerio Fiscal
organizada pola Secretaría Técnica da Fiscalía Xeral do Estado que, tras dous
anos de parón motivado pola pandemia, volve ao Pazo de Mariñán, en Bergondo.
No acto, no que tamén participou o Fiscal Superior de
Galicia, Fernando Suanzes, e o vicepresidente segundo da Xunta e conselleiro de
Xustiza, Diego Calvo, González Formoso destacou a “misión fundamental” que terá
a Fiscalía Europea, tema central das xornadas, para que “non se malgaste nin un
só euro a causa da corrupción ou o fraude transnacional”.
Segundo explicou Formoso, esta institución, que cumpre un
ano desde que foi creada co obxectivo de investigar e perseguir os delitos que
prexudiquen os intereses financieiros da Unión Europea, “preséntase como
fundamental para o avance, crecemento, desenvolvemento e evolución dos países
europeos”.
“A propia Comisión Europea recoñece que os países da UE
perderon en 2018 uns 140.000 millóns de euros en ingresos en concepto de IVE
como consecuencia do fraude transnacional e que 638 millóns de euros de fondos
estruturais europeos se utilizaron de forma indebida”, salientou.
Para o presidente provincial “é imprescindible afondar
tanto nos aspectos positivos deste novo órgano” que é a Fiscalía Europea “como
en aqueles que aínda hai que mellorar” xa que “ata a súa entrada en
funcionamento non tíñamos un verdadeiro control do fraude transnacional porque
os órganos existentes como a Oficina Europea de Loita Contra o Fraude (OLAF) ou
a Europol non podían abrir dilixencias de investigación penal nin incoar
procedementos penais nos Estados membros”.
González Formoso tamén aproveitou a súa intervención para
celebrar “que poidamos albergar na nosa provincia un evento de tan alto nivel,
no que se reúnen algúns dos maiores expertos xuristas do país” e agradeceu “á
Fiscalía Xeral do Estado, á Fiscalía Superior de Galicia e á Xunta de Galicia a
súa colaboración permanente para manter esta cita anual no Pazo de Mariñán”.
Un ano de vida da Fiscalía Europea, a debate
As xornadas discorrerán desde o mércores ata o venres, en
horario de mañá e tarde (o mércores e o xoves). A Escola de Verán será
clausurada o venres á unha da tarde. O director da escola, o fiscal de Sala da
Fiscalía do Tribunal Supremo, Fidel Cadena, será o encargado de dar por
finalizado o curso para os fiscais no pazo bergondés.
O curso comprende tres días de seminarios a cargo dos
máis importantes xuristas do país e está dirixido por Myriam Segura, fiscal da Fiscalía Especial
Contra a Corrupción e Criminalidade Organizada. A Escola de Verán do Ministerio
Fiscal está dirixida por Fidel Cadena, fiscal de Sala da Fiscalía do Tribunal
Supremo.
A Escola de Verán do Ministerio Fiscal ten este ano como
tema central a Fiscalía Europea, un ano despois da súa creación. Trátase dun
órgano independente da Unión Europea encargado de investigar os delitos que
atentan contra os intereses financeiros da UE e de exercer a acción penal
contra os seus autores e levalos a xuízo, en particular no que respecta á
fraude, á corrupción, ao branqueo de diñeiro, á fraude transfronteiriza en materia
de IVE. A Fiscalía Europea empezou a funcionar o 1 de xuño de 2021.
Tanto as
institucións e órganos da Unión como as autoridades competentes dos 22 estados
membros que participan na Fiscalía Europea deben informar a esta de calquera
conduta delituosa que afecte o orzamento da UE. Tamén os particulares poden
denunciar presuntos casos de fraude ou outros delitos.
A detección da fraude aos Orzamentos Públicos, a Autonomía como piar de
actuación do fiscal nacional e europeo, o seguimento social e mediático dos
procesos penais por fraude de subvencións son outras das cuestións que
serán tratatas ao longo da Escola de
Verán do Ministerio Fiscal. Departamento de comunicación