O simposio internacional "Pobre Mundo Rico" percorrerá Galicia da man do Club Internacional de Prensa

O foro analiza as desigualdades entre países ricos e pobres no planeta

"Pobre Mundo Rico" é a frase que define e aglutina todas as actividades do Simposio Internacional que sobre Pobreza e Desigualdade no Mundo, organiza o Club Internacional de Prensa -Secretaría Xeral de Comunicación- contando coa colaboración da Obra Social Caixanova, e a dirección xeral de Cooperación Exterior. Mesas-Debate e Conferencias percorrerán as sete cidades máis importantes de Galicia. Así, estarán en Vigo, A Coruña, Santiago, Lugo, Ourense, Pontevedra e Ferrol, ao longo dos meses de outubro e novembro: o acto de inauguración e as primeiras actividades serán en Vigo o día 2 de outubro, clausurándose o 29 de novembro en Santiago de Compostela. Así afirmárono en rolda de prensa en Vigo o secretario xeral de Comunicación da Xunta de Galicia, Fernando Salgado e o director xeral da entidade financeira Caixanova, José Luis Pego, tras asinar un Convenio de Colaboración que contribúe a levar a cabo as actividades deste Simposium que reunirá máis de 110 relatores e conferenciantes de ámbito nacional e internacional. Na súa intervención, Salgado fixo fincapé na capacidade deste simposio para "seguir identificando os factores desas desigualdades, buscando recetas que permitan poñer un gran de area na vía de solucionalas e no convencimento de que outro mundo tamén é posible". Compromiso social A programación deste foro responde tamén ao compromiso social de chamar a atención sobre a situación de desigualdade que viven os pobos e países dos distintos continentes. Non en van, os Ciclos que programa o C.I.P. son: "América, cada vez máis latina" e "Os latexos do mundo" -con Le Monde Diplomatique-, ademais dos "encontros do Club", ciclos polos que pasaron este ano personalidades de recoñecido prestixio internacional polo seu compromiso social e a súa firme defensa da igualdade e o dereito de todos os seres humanos a unha vida digna: Javier Alfaya, Carlos Gabetta, Mai Al Kaila, Gervasio Sánchez, Francisco Jarauta, Bernard Cassen, Luis Sepúlveda..., e esta mesma semana, a activista haitiana Suzy Castor, e na próxima, os xornalistas e escritores Ignacio Ramonet e Ramón Chao, son parte das persoas invitadas polo Club Internacional de Prensa de Galicia. Toma de conciencia O obxectivo deste simposio é, tanto por parte dos organizadores (Secretaría Xeral de Comunicación a través do Club Internacional de Prensa) como dos colaboradores (Caixanova, dirección xeral de Cooperación Exterior, USC...), contribuír a unha maior toma de conciencia social sobre todos aqueles aspectos que inciden, propician, determinan ou fomentan a grande desigualdade social que existe no mundo, e a pobreza á que viven condenados millóns de persoas. A través do debate e das conferencias que terán lugar ao longo de dous meses, afondarase nas razóns e argumentos que expert@s nas distintas materias porán sobre a mesa. Conseguir unha maior sensibilización da sociedade e elevar o grao de compromiso para poñer fin a ese desequilibrio que vive o mundo, é un dos obxectivos que se perseguen. Ademais das Mesas-Debate e as Conferencias, levaranse a cabo distintas proxeccións audiovisuais en múltiples xéneros: documentais, ficción, docudramas ou reportaxes realizados nuns casos polos propios alumnos de Comunicación Audiovisual das 3 Facultades galegas, e en outros, por profesionais do sector, como Patricia Ferreira, Carlos Estévez, e outros directores que están a manifestar o seu desexo de colaborar desinteresadamente con este Simposio Internacional, dende distintas partes do mundo.