Vendidas todas as entradas para o concerto de Maná o vindeiro 22 de xuño en Santiago

O Auditorio do Monte do Gozo de Santiago rexistrará un cheo total para recibir a Maná o vindeiro 22 de xuño. Máis de 28.500 persoas asistirán ao único concerto que a banda mexicana ofrecerá en Galicia, xa que a día de hoxe non quedan entradas para poder ver o directo de Maná. Así o informou Caixa Galicia nun comunicado. Máis de cen persoas comezarán o luns coa montaxe do escenario cuberto e a varias alturas, que precisa de dúas grúas, cinco carretillas elevadoras e sete xeneradores. A eles sumaráselles os máis de 50 técnicos que viaxan coa xira. O evento contará coa colaboración dun amplo dispositivo de seguridade formado por vixilantes privados, efectivos da Garda Civil, Policía Nacional, Policía Local, Bomberos e voluntarios de Protección Civil e Cruz Vermella. O Monte do Gozo abrirá as súas portas o vindeiro venres a partir das 18.30 horas. A partir das 18 horas funcionará unha liña especial de transporte para trasladar aos asistentes ata o recinto, que sairá da rúa da Rosa, e se reforzará a liña 6. O espectáculo está organizado por Cávea Producciones, Ymax Producciones e a Sociedade Anónima de Xestión do Plan Xacobeo, coa colaboración do Concello de Santiago.