APC | ALMORZOS ELECTORAIS
José Manuel Sande: "Queremos reconectar coa sociedade e ser decisivos"
REDACCIÓN | O candidato de Por Coruña, José Manuel
Sande, foi o convidado de hoxe nos Almorzos Electorais da APC no NH
Collection Finisterre. O ex concelleiro de Cultura e Deporte co goberno da
Marea sacou peito do seu labor e salientou que “políticas novidosas do
mandato pasado seguen a ter validez”.
Sande anunciou que volve á política “en positivo” aínda que é “bastante crítico”
co actual goberno: “Non houbo proxecto claro, non se aproveitou a pandemia
porque raras veces a política pode deterse e penso que esa oportunidade non
se aproveitou”. Neste sentido, engadiu: “A xestión da pandemia sen Unidas
Podemos no Goberno central tería sido outra moi distinta”.
Na súa opinión, hai cuestións importantes sen resolver “como o dereito á
vivenda que xa non é un problema na propiedade como era antes senón xa no
aluguer”. Tamén falou destes catro anos na área na que tivo competencias no
Goberno de Xulio Ferreiro, como son cultura e deporte: “Unha alcaldesa pode
levar competencias máis pequeñas, como poden ser os socorristas ou política
lingüística, pero non Cultura e Deporte. O PSOE debería mirar o seu propio
pasado, con fitos na Cultura como os museos científicos, a OSG ou a rede de
bibliotecas; agora o que ve a xente é falta de tempo e improvisación”.
Neste sentido, o candidato de Por Coruña afirma que o actual goberno non ten
proxecto, senón que está “baseado nao correncia” e hai “unha confusión entre
eventos, espectáculos e cultura”, nos que as boas cifras e algúns acertos non
xustifican a falta de planificación.
Critica tamén a actuación do PSOE en temas de “transparencia e procesos de
participación”: “Mantívose o escano cidadán, por inercia, e incluso
desapareceron nalgún caso os orzamentos participativos, que era “o que nos
confrontaba coa vella política, dito desde o respeto”. As escusas de que
“parece que a xente non participa o suficiente” non son, na súa opinión,
suficientes porque é necesario fomentar “a cultura da participación”.
Sobre a división na esquerda, Sande afirmou que tentaron a unidade coa
Marea pero non foi posible. “Ninguén pode pensar que é o propietario da
esquerda, o voto de esquerdas non pertence a ninguén”, comenta e admite que
son “proxectos irmáns en moitos sentidos” e que o próximo 28 de maio “o
abstencionismo vai ser clave”.
O seu proxecto, reivindica, “trata de ser un revulsivo fronte á intensidade da
etapa anterior” que considera foi “examinada con lupa” cunhas esixencias que
manifestan un trato desigual da etapa na que formou parte do goberno
comparada con esta última etapa. Queren “reconectar coa sociedade e ser
decisivos”.
Axenda
O vindeiro luns compartiremos almorzo co candidato do PP,
Miguel Lorenzo, mentres que o martes acompañaranos como representante do
BNG Avia Veira. O 17 estaremos con Xan Xove, de Marea, e pechará a
candidata do PSOE, Inés Rey. Departamento de comunicación