CASO ALVEDRO | CULLEREDO
María Rivas analiza con AENA e o Concello os posible usos comerciais da parcela do antigo aparcamento provisional de Alvedro
REDACCIÓN | A subdelegada do Goberno na Coruña, María Rivas mantivo hoxe un encontro de traballo na Subdelegación co alcalde de Culleredo, José Ramón Rioboo; o director do aeroporto de Alvedro, Joan Ibáñez; o xefe da Demarcación de Estradas en Galicia, Ángel González del Río, e a directora da área de Fomento da Delegación do Goberno, Ana Quintairos, para analizar os posibles usos comerciais e de servizos da parcela do antigo aparcamento provisional de AENA no aeroporto de Alvedro, xunto a N-550.
A subdelegada informou de que estes terreos, 20.000 metros cadrados que se habilitaron como aparcamento provisional para facilitar a construción do actual aparcamento do aeroporto coruñés, levaban sen actividade desde 2010. “Do que se trata e de poder darlles un novo uso e facelo ademais xerando novos servizos e oportunidades de emprego na comarca”, indicou Rivas.
No encontro, ademais de coñecer os posibles usos, que incluirían unha zona comercial, un aparcamento para autocaravanas e servizos asociados, tratouse a cuestión dos accesos á parcela, xa que os plans de AENA afectan a un proxecto que o Goberno consensuara co Concello de Culleredo para habilitar sendas peonís na contorna da N-550.
Con todo, a subdelegada apuntou que o proxecto para devolver a actividade aos terreos do aeroporto “aínda se atopa nunha fase inicial” e que os traballos agora se centran en definir as posibles actuacións para garantir os futuros accesos “nas mellores condicións de seguridade, tanto para peóns como para vehículos”. Neste senso, salientou o papel da Subdelegación do Goberno de cara a coordinar os diferentes estudos e actuacións que permitan facer realidade este proxecto.