O futuro do imposto de sucesións en Galicia, a debate este mércores no Club Internacional de Prensa
A reforma beneficia ó 99% das empresas familiares, maioritarias no tecido industrial galego
O Club Internacional de Prensa organiza este mércores 18 de xullo, ás 11:30 da mañá, unha mesa redonda para debater sobre o futuro do Imposto de Sucesións en Galicia, e todo canto implica a reforma deste imposto que está levando a cabo o Goberno galego. Moderados polo xornalista Luís Pousa, participarán os expertos Santiago Lago Peñas, profesor titular do departamento de Economía Aplicada da Universidade de Santiago; Xaquín Álvarez Corbacho, conselleiro no Consello de Contas de Galicia; Luís Caramés Vieites, presidente da AGEESP e Catedrático de Facenda da Universidade de Santiago; Antonio López, decano da Facultade de Dereito da Universidade de Santiago. Debatir tamén sobre a importancia deste Imposto, a súa función redistributiva e de coherencia cun modelo de sociedade no que salienta o mérito e o esforzo persoal, é tamén importante para termos clara a dimensión dunha medida desta envergadura. Argumentos todos eles a debater nesta Mesa Redonda á que están convidados, ademais de xornalistas especializado, diversos axentes sociais, como o empresarial, ou os Colexios profesionais como o de Avogados ou o de Economistas, Sindicatos e Asociacións de Empresas Familiares. Conseguir un Imposto sobre Sucesións e Doazóns máis xusto, reducindo a carga fiscal e incidindo en aspectos como a transmisión de vivenda, transmisión de empresas, incremento da contía mínima esixida para tributar, a redución dos tipos medios de tributación ou a revisión da tributación do colectivo de discapacitados, serán temas que tamén se debullarán neste debate aberto que se celebra este mércores 18 no Club Internacional de Prensa.