Representantes da sociedade galega promoven un manifesto en defensa dos dereitos dos galegofalantes

Denuncian a "discriminación" das persoas que falan galego

Trinta persoas de diferentes eidos da sociedade galega promoven o Manifesto a prol da convicencia lingüística e da igualdade de dereitos para o galego, presentado en Santiago polo presidente da Mesa Pola Normalización Lingüística, Carlos Callón, xunto con intelectuais e artistas galegos. O presentador de televisión Xosé Manuel Piñeiro foi o encargado de ler o texto, no que se lembra o carácter oficial da lingua galega e no que se denuncia a "discriminación" que sofren os galegofalantes. "É o galego o que corre perigo como idioma e os galegofalantes os que non son debidamente respectados", afirman os asinantes deste manifesto, que nace ante os "preocupantes intentos" promovidos dende Madrid para convencer á opinión pública de que "o castelán corre perigo de desaparición", co fin de que "os falantes do galego non teñan dereitos lingüísticos". Así, acusan a certos sectores da sociedade española de "negar a existencia de pobos e linguas diferentes" dentro do Estado, e por tanto, "negar a convivencia e a igualdade". Por este motivo, alertan á sociedade galega "para non deixarse confundir" e para que reflexionen sobre a verdadeira situación do galego en Galicia. Ao mesmo tempo, esperan un compromiso por parte das institucións do Goberno galego para defender a igualdade de dereitos para o galego e normalizar o seu uso. "Debemos ser firmes rexeitando todo posicionamento que persiga recortar dereitos ou retroceder no cativo camiño andado nas administracións públicas e na vida social", conclúe o manifesto, co que responden ao Manifesto pola lingua común, promovido por Fernando Savater e Vargas Llosa, entre outros, no que amosan unha "preocupación por la situación de la lengua castellana". Máis manifestos Callón afirmou en rolda de prensa que o manifesto presentado súmase a outros en defensa da lingua galega promovidos recentemente pola Federación de Asociacións de Escritores Galeusca, na que está inscrita a Asociación de Escritores en Lingua Galega, por profesores universitarios de todo o Estado e polo Galeusca de Historiadores. Á presentación asistiron o director de cine Ignacio Vilar, a escritora Yolanda Castaño, o galeguista Avelino Pousa Antelo, o presidente da Asociación Galega de Editores, Alfonso García Sanmartín; o presidente da AELG, Cesáreo Sánchez; o presidente da Asociación Socio-Pedagóxica Galega, Xoán Costa; o presidente de Nova Escola Galega, Xosé Lastra, e o presidente da Rede Galega de Empresas, Benigno Pereira, entre outros. Deste xeito, comeza un camiño na procura de adhesións, que se desenvolverá principalmente a través da rede, coa recollida de sinaturas na web www.amesanl.org. Ata o de agora, adheríronse ao manifesto as cantantes Ana Kiro, Uxía Senlle e Mercedes Peón, os escritores Bernardino Graña, Manuel Rivas, Xosé Luís Méndez Ferrín, Teresa Moure e Luís González Tosar, os arquitectos César Portela e Manuel Gallego Jorreto, o escultor Francisco Leiro, o libreiro Xurxo Patiño, os profesores Isaac Alonso Estravís e Jorge Mira, o decano do Colexio Profesional de Xornalistas, Xosé Manuel Pereiro, e a presidenta de Irimia, Sole González, ademais dos presentes na lectura do manifesto desta mañá.