A Coruña acolle este mércores o acto de entrega das Medallas de Ouro ao Mérito en Belas Artes

O Teatro Colón da Coruña acollerá este mércores día 15 o acto de entrega das Medallas de Ouro ao Mérito en Belas Artes, outorgadas polo Consello de Ministros do Goberno español. O acto estará presidido polos Reis de España e polo ministro de Cultura, César Antonio Molina. Entre os 21 galardoados, atópanse o actor Antonio Banderas, as actrices Marisa Paredes e Berta Riaza, o director de orquestra Daniel Barenboim, a cantante de ópera Cecilia Bartoli, os directores de cine Antonio Isasi-Isasmendi e Manoel de Oliveira, a galerista Helga de Alvear, o musicólogo Tomasi di Lampedusa, a pianista Maria Joao Pires, o escritor Jorge Semprún, a bailarina e coreógrafa Alicia Alonso, a artista circense Paulina Andreu, o historiador Alfonso Pérez Sánchez, a restauradora Carme Ruscalleda ou o matador de touros, José Tomás, ademais da Brigada do Patrimonio Histórico e a Fundación Telefónica. As distincións recaerán tamén en Galicia, da man da cantante Luz Casal, do deseñador Roberto Verino e os oleiros de Buño. O Ministerio valorou dos oleiros de Buño, en Bergantiños, a conservación "durante séculos" dunha "tradición oleira única", e que hoxe "segue máis viva que nunca" grazas a un bo número de artistas que continúan a traballar ao vello estilo pero con achegas innovadoras á súa produción. Dende a súa aparición, na Prehistoria, a olería de Buño viviu o seu esplendor nos séculos XVII, SVIII e XIX, cando adquiriu as pautas decorativas que aínda se seguen hoxe. Pola súa banda, o deseñador verinés Roberto Verino conta co mérito de ter extendido as súas coleccións, representada en máis de 20 países, mesmo nas pasarelas nacionais e internacionais máis importantes, especialmente Francia, Inglaterra, Bélxica e Estados Unidos. De Luz, salientan o feito de ser unha das solistas máis valroadas da música pop-rock española. Nada en Boimorto (A Coruña), trasladouse a Madrid dende o ano 1977, e cinco anos despois publicou o seu primeiro álbum, 'Luz'. A este seguíronlle novos discos, como 'A contraluz', 'Como la flor prometida', e 'Vida tóxica', publicado en 2007. Entre as distincións acumuladas pola artista atópase o Premio Goya á mellor canción orixinal por 'Tu bosque animado' e catro discos de platino por 'A Contraluz'. As Medallas de Ouro ao Mérito nas Belas Artes naceron en 1969, e dende entón e ata 1992, entregáronse no Museo do Prado de Madrid. A partir dese ano, celebrouse nas distintas comunidades autónomas. Hai xusto dez anos que se entregaron por primeira vez en Galicia, e foi en Santiago de Compostela. Ciclo no CGAI Co gallo da entrega das Medallas de Ouro ao Mérito en Belas Artes ao director Manoel de Oliveira e á actriz Marisa Paredes, o Centro Galego de Artes da Imaxe (CGAI) recupera como homenaxe a única colaboración entre ambos e un título de Oliveira aínda inédito en Galicia. A entrada a ambos pases é gratuíta. Así, este martes ás 20.30 horas proxectarase 'O espelho mágico', de Manuel de Oliveira sobre a novela 'El alma de los ricos' de Agustina Bessa-Luís, e coa interpretación de Marisa Paredes. O mércores á mesma hora, poderá verse por primeira vez en Galicia outro filme de De Oliveira, 'Cristóvao Colombo. O enigma'. Deste xeito, o CGAI únese tamén as celebracións polo centenario do cineasta portugués, en decembro deste ano.