Profesionais de 15 países asisten ao III Mercado Internacional de Curtas de Santiago

Un total de 129 profesionais procedentes de 15 países participan esta semana no III Mercado Internacional de Curtametraxes de Santiago, que se desenvolve ata 24 de outubro no Colexio Oficial de Arquitectos de Galicia e na Fundación Caixa Galicia. Os participantes poderán acceder a un catálogo composto por 2.648 curtas de 93 países diferentes, e mercar os dereitos de emisión das curtas que lles interesen. Ademais, o Festival Curtocircuíto continúa o seu programa de proxeccións da Semana Oficial. Así, o Teatro Principal volverán ofrecer proxeccións gratuítas dos filmes incluídos na sección oficial: de 18.30 a 24 horas poderán verse curtas de países como Reino Unido, Alemaña, Israel, Finlandia, Canadá ou Filipinas. O público asistente poderá votar para o Premio do Público, que se entregará na gala de clausura, que se celebrará o 24 de outubro no Teatro Principal, e na que se entregarán os outros oito premios do Festival. Dentro das actividades paralelas, desenvólvese a segunda xornada do programa 'As Grandes Curtas', que pretende achegar o mundo das curtametraxes ás persoas maiores. Desta vez, participan 60 persoas da provincia de Lugo. Destaca tamén o programa de curtas para nenos e o Programa dos Nominados ao Premio do Cine Europeo, na Facultade de Filosofía. A medianoite haberá unha sesión de DJ Alexander no Ultramarinos, mentres que mañá Enrique Criado impartirá ás 13 horas no Teatro Principal o Obradoiro de Esteroscopia.