Agadic promoverá máis de mil funcións e concertos durante o primeiro semestre de 2009

As tres redes de distribución de teatro, danza, maxia e música que promove a Consellaría de Cultura a través da Axencia Galega das Industrias Culturais ofrecerán un total de 1.015 funcións e concertos entre os meses de xaneiro e xuño. Destes, 466 corresponden á Rede Galega de Música ao Vivo, 394 á Rede Galega de Teatros e Auditorios e 155 á Rede Galega de Salas.
 
Unha das novidades deste primeiro período da programación de 2009 é a incorporación á Rede Galega de Salas da Sala The Star, no concello coruñés de Carral, coa que xa son sete os espazos asociados a este circuíto. Xunto co devandito local, están o Teatro del Andamio na Coruña; a Sala Nasa, a Sala Santart e oTeatro Escena en Santiago; e o Teatro Arte Livre e o Teatro Ensalle en Vigo.
 
A Rede Galega de Salas acollerá neste semestre as últimas propostas de 50 compañías, 41 delas galegas e 9 procedentes doutros puntos do Estado; cunha presenza destacada das novas tendencias escénicas e do teatro infantil.
 
No caso da Rede Galega de Teatros e Auditorios, un total de 80 espectáculos escénicos a cargo de 67 compañías, 58 galegas e 9 de fóra de Galicia, dan forma a esta carteleira, que se desenvolve en 46 espazos xestionados por concellos e entidades privadas de todo o país.
 
Canto á Rede Galega de Música ao Vivo, 97 grupos e solistas de todos os estilos musicais actuarán até xuño nos 42 locais que integran na actualidade este circuíto.