VANGARDAS SONORAS
Caixa Galicia trae a Galicia a Josh Rouse, Sr.Chinarro, The Wave Pictures e Aaron Thomas
A Fundación Caixa Galicia vén de anunciar a programación da última edición do seu ciclo 'Vangardas Sonoras', unha iniciativa coa que a entidade achegará a diferentes cidades galegas algunhas das máis interesantes e celebradas propostas da música independente mundial.
Como en anos anteriores, a edición 2009 de 'Vangardas Sonoras' inclúe cinco concertos entre os meses de febreiro e maio, todos a un prezo único de seis euros. Desta volta, repítese o modelo de anos anteriores: recitais íntimos de artistas independentes cunha sólida reputación, en auditorios pequenos e a un prezo económico.
Viaxe por toda Galicia
O concerto inaugural terá lugar o vindeiro 17 de febreiro no Teatro Salesianos de Vigo coa actuación do cantautor norteamericano Josh Rouse, unha das voces máis respectadas do novo folk e do alt country ianqui.
En Ferrol, o día 6 de marzo, o auditorio da Fundación Caixa Galicia acollerá o concerto do único intérprete español do cartel, Sr.Chinarro, un dos artistas máis consolidados da escena indie nacional que presentará en Galicia o seu último disco, 'Ronroneando'.
Máis tarde, o 18 de abril, e por vez primeira en Galicia, chegará á sede da Fundación Caixa Galicia na Coruña un dos máis abraiantes grupos do pop británico, The Wave Pictures, responsables dun dos mellores discos do ano, 'Instant Coffe Baby'.
Xa o día 8 de maio, o Teatro Principal de Santiago acollerá o concerto do australiano Aaron Thomas, nunha cita dobre na que actuará como artista convidado Darren Hayman, o antigo líder da banda de culto británica Hefner. Thomas, artesán pop e boxeador afeccionado durante unha longa estadía en Ucraína, presentará ao público galego o seu último traballo, 'Follow the Elephant', mentres que Darren Hayman, pola súa banda, chegará tamén por primeira vez a Galicia co seu décimo álbum, o terceiro en solitario, 'Pram Town'.
O derradeiro concerto desta edición terá lugar o día 23 de maio no Café Moderno de Pontevedra e terá como protagonista a Damien Jurado. O brillante e intenso cantautor de Seattle, un dos líderes da escena pop mundial, presentará en Galicia o seu noveno e último álbum, 'Caught In The Trees', marcado polo seu recente divorcio despois de dezasete anos de convivencia coa súa ex muller.