MÚSICA

Caixa Galicia leva "Carmina Burana" e a "Novena Sinfonía de Beethoven" á Coruña

Este mércores, día 25 de marzo, ás oito e media do serán, no Teatro Colón Caixa Galicia da Coruña terá lugar a actuación da Orquestra Sinfónica e o Coro da Radio Nacional de Ucranía, que interpretarán para o público coruñés 'Carmina Burana', a célebre composición inspirada nunha colección duns 300 cantos dos séculos XII e XIII.

Os poemas, escritos a maioría en latín, incluén cancións de amor, de taberna, sátiras, cancións estudiantís... pero todos constitúen un canto ao amor e aos praceres terranais, rompendo así coa imaxe que tradicionalmente se lle atribúe ao medievo.

O músico alemán Carl Orff compuxo en 1937 esta cantata e desde entón a obra conquistou o favor do público grazas a súa espectacularidade e ao misterio que envolve toda a temática medieval. A súa inclusión en filmes como 'Excalibur' e 'El séptimo sello' incrementaron a popularidade da obra.

No concerto tamén interpretarán a 'Novena Sinfonía de Beethoven', o máis coñecido himno á irmandade universal. A súa estrea, en 1824, espertou gran expectación e ninguén quixo perder a presentación da esperada sinfonía e da que podía ser a última aparición pública do xenio alemán, como así ocorrería, pois nos tres anos seguintes e ata a súa morte, Beethoven permanecería na casa, afectado de diversas enfermidades.

DANZA

A oferta cultural continuará o día 26 de marzo co espectáculo de danza 'Vuelo 6408', unha montaxe composta por catro pezas de catro compañías diferentes que a partir da súa participación no certame coreográfico de Madrid deciden coller o mesmo voo e representar as súas creacións conxuntamente.

'Cuadra-t' de Natxo Montero, 'Se va del Aire' de Janet Novas, 'No intre 1800' de Pisando Ovos e 'Carlos & me' de Sharon Fridman compoñen 'Vuelo 6408', unha oportunidade para ver catro visións coreográficas diferentes gañadoras de diferentes premios entre eles o primeiro e segundo premio e o premio do público do Certamen Coreográfico de Madrid do ano 2007.

COLÓN EN FEMININO

O día 27 de marzo, Paloma San Basilio, voz referencial da música española nos últimos trinta anos, presentará no teatro Colón Caixa Galicia o seu último espectáculo, 'PSB'. A artista madrileña, que pasou parte da súa adolescencia en Lugo, regresa a Galicia cun proxecto co que quere recuperar a intimidade e a proximidade dos seus primeiros recitais, logo da xira de éxito 'Encantados', na que estivo acompañada por Luis Cobos e unha orquestra sinfónica de máis de sesenta músicos.
Este concerto forma parte do ciclo 'O Colón en feminino', que xa levou ata o escenario coruñés as actuacións de Niña Pastori, Pasión Vega e que tamén ofrecerá os concertos de Paloma San Basilio e Diana Navarro.

Por último, pechará a programación do Colón Caixa Galicia do mes de marzo, o día 29, a obra de teatro infantil 'Sueño de una noche de verano', unha obra na que se unen monicreques e actores. Mentres os monicreques entreteñen aos pequenos, os mozos entran de cheo na trama cos personaxes.