CINE
A Fundación Caixa Galicia proxecta dúas novas películas do ciclo "Paul Newman"
Este martes, ás seis da tarde en versión dobrada ao castelán e ás
oito e media do serán en versión orixinal subtitulada, a sede da Fundación Caixa
Galicia en Santiago acollerá a proxección dun novo filme do ciclo 'Paul Newman'.
Nesta ocasión, exhibirase na sala da Fundación Caixa Galicia o filme 'O gran
salto', de Joel Coen, un filme rico en diálogos, rapidísimos e enxeñosos, pero
que é aínda máis rico no seu coidadísimo aspecto visual.
Nese sentido, é unha das películas máis brillantes dos Irmáns Coen. Cinta
chea de símiles, metáforas, montaxes paralelas e efectos especiais ao servizo da
imaxe. Como é habitual nos títulos dos Coen, os personaxes dominan a narración,
baseados en prototipos clásicos moldéanse ata converterse en personaxes made in
Coen.
'O gran salto' é ante todo un filme falcatrueiro, complexo e cheo de
homenaxes e referencias ao cine clásico dos 40 que reversiona con absoluta
mestría, ademais de facer un bo número de chiscadelas a clásicos recentes do
cine americano, como Capra, Allen, Hawks, Wilder e ata Terry Gilliam.
O argumento transcorre nunha importante empresa. Cando o director se suicida,
todos os membros deciden unirse para obter o maior beneficio económico da
compañía. Todo o grupo elabora un minucioso plan que consiste en poñer á fronte
do consello de dirección a un novo director que se deixe manipular. Todo parece
sinxelo ata que entra en escena Amy Archer.
VIGO
Este mesmo ciclo, chegará tamén mañá a Vigo co mesmo horario. A cidade
olívica acollerá a procección de 'A lenda do indomable', de Stuart Rosenberg,
unha das mellores películas carcerarias. É Paul Newman quen dá corpo ao
personaxe de Luke, un heroe de guerra que non encontra o seu lugar tras a volta
á casa. O director imprime un ritmo trepidante, encadeando os pequenos sucesos
que acontecen naquel barracón.
A acción ten lugar nunha prisión sureña de estrada nos primeiros anos 60. O
filme narra a historia de Luke 'Cool Hand' Jackson, heroe condecorado da Segunda
Guerra Mundial, con dificultades de adaptación, detido pola policía tras romper,
en estado de embriaguez, varios contadores de aparcadoiro.
Condenado a dous anos de traballos forzados, reclúeno na Road Prison 36,e n
Florida. A vida no penal é durísima, con compañeiros castigados a penas moito
maiores, e a violencia, en presos e carcereiros, un hábito do que ninguén pode
prescindir. Luke, veterano de guerra, non está disposto a ceder, pero terá que
pagar un prezo pola súa pretensión de seguir sendo el.