PROXECCIÓNS

A Fundación Caixa Galicia trae catro novas películas para o ciclo "Paul Newman"

Este martes, a sede da Fundación Caixa Galicia en Santiago acollerá a proxección dun novo filme do ciclo 'Paul Newman'. Nesta ocasión, exhibirase na sala da Fundación Caixa Galicia o filme 'Camiño á perdición', de Sam Mendes. Seguindo os clixés do cine sobre o crime organizado, encontramos un usual clima sombrío e fatalista, recollido en personaxes e en localizacións: interiores de luz tenue, exteriores nocturnos ou diúrnas paisaxes de aspecto desolador.

Unha noite de chuvia, Sullivan e Connor cometen un asasinato ante a mirada de Michael Sullivan Jr. Os celos polo afecto de seu pai cara a Michael e a busca do silencio do neno, levarán a Connor a desexar a súa morte. Esta é unha historia de vinganza e fuxida ao máis puro estilo do cine negro, pero a narración intérnanos nas relacións familiares e todo aquilo que estas comportan.


PONTEVEDRA

Pola súa banda, Pontevedra acollerá a proxección de 'O gran salto', de Joel Coen, un filme rico en diálogos, rapidísimos e enxeñosos, pero que é aínda máis rico no seu coidadísimo aspecto visual. Como é habitual nos títulos dos Coen, os personaxes dominan a narración. Baseados en prototipos clásicos, moldéanse ata converterse en personaxes made in Coen.

Cando o director dunha importante empresa se suicida, todos os membros deciden unirse para obter o maior beneficio económico da compañía. Todo o grupo elabora un minucioso plan que consiste en poñer á fronte do consello de dirección a un novo director que se deixe manipular. Todo parece sinxelo ata que entra en escena Amy Archer.


VIGO

A cidade olívica será o escenario de 'Veredicto final', de Sidney Lumet, un excelente drama sobre procesos xudiciais. A película ocupa os seus últimos minutos, como o xénero require, coa alegación final de Newman ao borde do precipicio.

Frank Galvin é un avogado de certa idade vido a menos. Afundido, pasa o tempo bebendo e facendo pequenos traballos. Un antigo socio lémbralle o caso dun erro médico cometido nun hospital, que aínda non concluíu, e no que Galvin interveu. A medida que prepara o caso, recibe ofertas económicas para arranxar o asunto sen ir a xuízo, pero Galvin está disposto a xogalo todo, para conseguir unha importante indemnización para os familiares e para refacerse como avogado.


OURENSE

Ourense acollerá a proxección de 'Cortina resgada', de Alfred Hichcock, un thriller de espionaxe internacional con elementos de acción, suspense, misterio e romance. O mestre Hitchcock consegue envolver toda metraxe dunha densa atmosfera de tensión. A acción resólvese en termos dunha loita entre o ben contra o mal nun contexto no que abundan as alusións ao réxime político.

Michael Armstrong é un reputado científico norteamericano que se fai pasar por un desertor da Alemaña Oriental para así poder conseguir información sobre a tecnoloxía nuclear soviética. Pero a súa moza e secretaria sígueo tras o pano de aceiro contra a súa vontade. Cando Michael descobre a información que buscaba, a parella deberá pasar por todo tipo de situacións perigosas para fuxir do país.