LITERATURA

Xa hai finalistas para os Premios Xerais 2009

O venres 29 de maio reuniuse no castelo de Soutomaior o xurado da XXVI edición do Premio Xerais de Novela, dotado con 25.000 euros e no que participaron corenta e cinco obras. Este xurado acordou declarar finalistas as obras presentadas baixo os lemas 'A soidade dos leóns', 'Dinara', 'Limiar da conciencia' e 'O retorno das aves'.

Pola súa banda, o xurado da IV edición do Premio Fundación Caixa Galicia de literatura xuvenil, dotado con 10.000 euros e no que participan dezanove obras acordou declarar como finalistas as obras presentadas baixo os lemas 'Ás de bolboreta', 'Dragal' e 'Quiromántico'.

Por último, o xurado da XXIV edición do Premio Merlín de literatura infantil, dotado con 10.000 euros e no que participan vinte e catro obras, acordou declarar como finalistas as obras presentadas baixo os títulos 'Papude', 'Secundario' e 'Septempunctata'. O fallo de cada un dos premios darase a coñecer no serán do sábado, 6 de xuño, no acto literario que terá lugar na illa de San Simón.