Miles de manifestantes piden en Santiago la retirada del decreto del plurilingüismo en la enseñanza

 Milleiros de persoas, a título individual ou representando aos máis de 700 colectivos que aglutinan a plataforma Queremos galego saíron onte ás rúas de Santiago de Compostela para reclamar a "retirada do decretazo xa", en referencia á normativa deseñada pola Xunta de Galicia para regular o uso dos idiomas nos centros educativos.

A xornada de conmemoración das letras galegas tornouse nunha numerosa protesta que foi encabezada por unha consigna: 'O galego, a forza do noso amor', polo autor ao que se lle adicou este ano o 17 de Maio, Uxío Novoneyra.



Decenas de pancartas con lemas tales como "paremos o decretazo", "en defensa da lingua galega" ou "se aínda somos galegos é por obra e gracia do idioma" percorreron as rúas de Compostela dende a Alameda ata a Praza do Obradoiro, que quedou pequena para albergar a todos os asistentes. A organización falou de 100.000 asistentes, mentres outras fontes consultadas sitúan en 25.000 o aforo desta praza. Cabe destacar que o entorno da Catedral estaba ateigada tamén de manifestantes.



Houbo lectura dun manifesto no que se culpou ao presidente da Xunta, Alberto Núñez Feijóo, de "incumprir de forma incívica o mandato estatutario" de defender e promover e lingua con este "decretazo contra o galego". Tamén quixeron trasladar ao Goberno galego que "gañar eleccións non significa poder exercer o poder de forma abosluta".



Pero á marxe disto, predominou o ambiente festivo tanto na marcha -con gaitas e tambores- como no punto final da mesma, onde diversos actores e artistas cantaron (Uxía Senlle ou Xosé Lois González 'O Carrabouxo') para animar ao persoal ata que se fora enchendo a praza.Nese periodo, algúns como Carlos Blanco optaron, incluso, por recurrir ao trilingüismo para falar aos peregrinos que se atopaban no entorno. En galego, inglés e castelán, díxolle que os presentes non eran máis que galegos manifestándose para defender o idioma.



Pediu "misas en galego na Catedral" e incluso tamén "unha en alemán". Quico Cadaval dirixiuse a Feijóo para dicirlle que "tivo o apoio de moitísimos galegos", polo que o instou a "non contentar só á ultradereita".



Neste Día das Letras Galegas, por primera vez, BNG e PSdeG acudiron ao mesmo evento. Así, bandeiras dos nacionalistas e dos socialistas deixáronse ver nun escenario compartido, aínda que a estratexia de adianto de colectivos coma Galiza Nova (atallaron en lugar de facer todo o percorrido) retrasou un pouco a chegada do PSdeG ao Obradoiro.



En todo caso, os dous Vázquez deixaron claros os seus posicionamentos nesta convocatoria. O líder do PSdeG, Manuel Vázquez, explicou que o apoio dos socialistas é «coa sociedade galega", recrimou a Feijóo -asegurou que o PP está "illado" neste asunto- que faga caso "aos sectores máis antigaleguistas" e ameazou con "chegar a tomar medidas legais" no caso de que a Xunta non recúe e siga adiante con este decreto, "anticonstitucional".



O portavoz nacional do BNG, Guillerme Vázquez, pola súa banda, opina que "a nosa misión non é xudicializar os asuntos políticos" e reiterou a reivindicación dos nacionalistas de que a Xunta "debe retirar o decreto do ensino dunha vez por todas", porque responde a unha política lingüística de "ataque frontal ao idioma".



Ambos concordaron na demanda da retirada co voceiro da plataforma Queremos Galego, Carlos Callón, quen nunha extensa intervención reiterou unha e outra vez a necesidade de promover o galego máis alá de "ideoloxías" e quen asegurou que un 20% dos rapaces de 14 a 19 anos son "analfabetos funcionais en galego".



As reaccións do PPdeG á manifestación non se fixeron esperar. Asegura que respecta a todos os manifestantes, pero indica que socialistas e nacionalistas só lograron convocar ao 1% dos seus votantes nos comicios autonómicos "en favor de impoñer o galego". O resto, interpretan, están "dacordo coas tesis" da Xunta e contra "a dictadura lingüística".