MEDIO AMBIENTE
Los miembros de un proyecto europeo sobre formación en medio ambiente visitan Sogama
Un grupo de participantes nun proxecto europeo sobre formación en materia de medio ambiente e enerxías renovables, integrado por responsables políticos, técnicos e expertos no sector procedentes na súa maior parte das provincias italianas de Siena e Grosseto, realizaron unha visita ás instalacións de Sogama en Cerceda atraídos pola xestión desta entidade pública, que logrou compatibilizar o tratamento sostible dos residuos urbanos e a produción de enerxía limpa a partir da fracción non reciclable dos mesmos.
Guiados polo equipo de educadores ao servizo da Sociedade, o colectivo, que mantivo un encontro co presidente de Sogama, Luis Lamas, realizou un percorrido polas distintas plantas que conforman o Complexo Medioambiental, comprobando as sucesivas etapas polas que debe pasar o lixo para que sexa tratado conforme ás súas características, posibilitando a reciclaxe dos materiais susceptibles de ser reciclados e recuperando enerxeticamente o resto ou, o que é o mesmo, poñendo en valor, a través da súa transformación en enerxía eléctrica, a parte non reciclable por outras vías.
Cofinanciado polo Fondo Social Europeo, este proxecto, que leva por nome "RinnovAmbiente", persegue un intercambio de coñecementos e experiencias sobre políticas enerxéticas e ambientais, toda vez que ambas as dúas estanse a converter no eixe central do debate sobre o futuro do Planeta. O esgotamento das reservas de petróleo e a preocupación polo cambio climático e as súas consecuencias sobre a Humanidade, constitúen fenómenos aos que, en primeira instancia, débese dar resposta a través do aforro e a eficiencia enerxética, así como a promoción das enerxías renovables. É por iso que esta iniciativa, da que forma parte a Deputación de A Coruña, pretende instaurar un conxunto de actividades de información e formación dirixidas a difundir unha nova cultura enerxética europea, nacional e local, empezando polo desenvolvemento e a obtención de novidosas técnicas e formas de produción que combinen a xeración e uso da enerxía coa preservación do contorno.
Neste escenario, o obxectivo primordial dos estudos realizados focalízase cara a promoción de accións formativas dirixidas a diferentes grupos sociais (expertos, técnicos, compañías vinculadas á produción enerxética, usuarios, políticos, xestores, institucións, centros educativos, etc), deseñando o marco axeitado que permita pechar, dunha forma sostible e duradeira, a cadea de produción e consumo. Para isto contémplase a creación de 8 grupos de traballo, constituídos por, alomenos, 6 participantes, que en todo caso deben ser representantes das provincias italianas de Siena e Grosseto, así como dos socios técnicos e transnacionais, os cales achegarán expertos na materia dos seus propios territorios.
A través destes colectivos preténdese analizar e avaliar as boas prácticas ambientais e o Know How, mellorando o coñecemento para a creación dunha rede europea educativa no campo da enerxía.