Cultura pon en marcha unha nova política de apoio á música galega e á súa proxección internacional

Empresas do sector e artistas estarán presentes por primera vez nas principais feiras do mundo

A conselleira de Cultura e Deporte, Anxela Bugallo, presentou en Santiago a nova política do seu departamento para apoiar a música galega e proxectala internacionalmente. Entre as principais propostas para este ano están as axudas á promoción exterior -tanto para empresas como para artistas-, á producción discográfica e a difusión. Bugallo explicou que a estratexia xeral vaise centrar en catro apartados: a consideración da música como unha industria cultural, a ordenación das políticas públicas de fomento da música, a atención ás necesidades da visibilización social e distribución da música galega ao vivo (concertos) e dos productos fonográficos editados na autonomía e, por último, a internacionalización. Ditas liñas de actuación materializaranse en tres grandes ámbitos: as políticas de axudas e accións afíns, as de programación e de promoción e as de proxección exterior. Este ultimo apartado permitirá, segundo a conselleira, que Galicia estea presente por primeira vez nas principais feiras de música do mundo. Neste sentido, o director xeral de Creación e Difusión Cultural, Luís Bará, informou de que o día 21 de xaneiro ábrese Miden (Cannes, Francia), a principal feira europea da industria musical, onde estará presente a autonomía de forma institucional, cun stand que acollerá ás empresas do sector, que poderán ofertarlle os seus productos aos intermediarios de todo o mundo. Dirección Xeral e Instituto Galego das Artes Escénicas e Musicais (Igaem) esperan participar tamén nas outras dúas feiras de música máis importantes de Europa, o Popkomm (Berlín) e o Womex (Sevilla). Obxectivos concretos Entre os obxectivos concretos desta nova política, a conselleira de Cultura referiuse ao potenciamento dun mercado musical galego que facilite a distribución dos productos discográficos, a exhibición das propostas musicais e a creación de modelos de exhibición en rede, que faciliten a chegada e o contacto dos músicos co público. Xunto co asentamento dunhas liñas de axuda orientadas a favorecer a innovación e a creación emerxente, a Consellería quere por en marcha tamén servizos que aporten valor engadido ás axudas directas, como o asesoramento empresarial ou a introducción de liñas de financiamento preferente. Axudas O Igaem ten convocadas xa axudas destinadas ás empresas para a súa asistencia a feiras, festivais e mercados internacionais. Pero haberá tamén axudas para a proxección exterior de artistas galegos - que a Dirección Xeral de Creación e Difusión Cultural covocará nestre trimeste- e as adicadas á producción discográfica e difusión de proxectos discográficos. Pola súa parte, a Rede Galega de Teatros e Auditorios continuará en 2007 coa distribución de espectáculos entre os 45 concellos e entidades que participan, cunha programación específica neste eido dedicada á música de cámara. Impulsarase tamén a Rede Galega de Música ao vivo, que botará a andar neste mes e na que poderán participar ata 70 solistas nun total de 40 locais de Galicia, con preto dun milleiro de concertos previstos. Completan este apartado o Circuíto 4x4 (proxecto de programación musical para os concellos) e os Circuítos Culturais (cas ofertas de Cultura na rúa, Cultura nova e Cultura en Familia). Para a proxección exterior, Cultura tamén creu unha serie de materiais promocionais, como unha guía de recursos da industria musical galega, a compilación de 50 temas de música galega escollidos por unha comisión de expertos ou un videoclip promocional da marca "Galician tunes. Music in action".