A Xunta pon en marcha a campaña "En galego, tes todo por dicir" para vencellar a lingua a unha imaxe de contemporaneidade

Poranse en marcha accións específicas para fomentar o seu uso especialmente entre a xente nova

A campaña "En galego, tes todo por dicir" vencella a lingua a unha imaxe de contemporaneidade. A Secretaría Xeral de Política Lingüística da Xunta presentou a nova campaña, que se difundirá en todos os medios de comunicación galegos e en publicidade exterior e na que se inviste preto dun millón de euros. A nova campaña incidirá ao longo do ano en distintos ámbitos da poboación, como o lecer da mocidade, a xente maior, a educación, a transmisión familiar, o comercio e a empresa, a cultura, a sanidade, o dereito e as novas tecnoloxías, e irá acompañada de accións específicas para cada un deles. Dirixida ós mozos E na xente nova onde Política Lingüística prestará unha maior atención, con actividades relacionadas co lecer da xuventude galega. Segundo o último estudo do Instituto Galego de Estatística (Ige) o uso do galego como lingua habitual descende conforme diminúe a súa idade, a pesar de que "son estes os que máis coñecemento teñen da lingua", observou a secretaria xeral de Política Lingüística, Marisol López. Como novidade, Política Lingüística iniciará accións específicas tamén nas maternidades e nos cursos de preparación ao parto, xa que a transmisión familiar xoga un papel importante no uso da lingua galega. A campaña "En galego, tes todo por dicir" tenta darlle prestixio á lingua para que "os máis novos se sintan cómodos usándoa", xa que son "sectores estratéxicos e de futuro para a lingua", declarou Marisol López. Segundo a secretaria xeral, os estudos sociolingüísticos do galego revelan que Galicia é a comunidade autónoma con "maior nivel de coñecemento e comprensión" da súa lingua propia, polo que o desuso do galego en certos segmentos "débese a que non valoramos a nosa lingua como útil". Así o cre tamén o presidente do Consello da Cultura Galega, Ramón Villares, na presentación dunha campaña que considerou "imprescindible". Sen embargo, engadiu, "con iso non chega". Para Villares, a solución ao problema do prestixio da lingua galega "depende dos falantes" e pasaría por que a sociedade "asumise a lingua como algo normal". Estatuto Por último, tanto Marisol López como Ramón Villares valoraron a oportunidade que o novo Estatuto de Galicia lle brindaría á mellora da situación do galego. Para López, o fracaso na negociación da reforma estatutaria significa "unha oportunidade perdida para recoñecer a igualdade do galego e do castelán". Pola súa banda, Villares opinou que as propostas do BNG e do PSdeG, "un pouco máis avanzadas cás do actual Estatuto", mellorarían a situación lingüística, aínda que esta "non se arranxa cun papel, senón con práctica social".