A Fundación Barrié centra a súa actividade de 2007 na arquitectura e no patrimonio cultural
Inicia un programa plurianual de rehabilitación e restauración da Catedral de Santiago
A Fundación Pedro Barrié de la Maza centra a actividade deste ano na conservación do patrimonio cultural e na arquitectura. O orzamento da fundación para as actividades de 2007 ascende a 21 millóns de euros, segundo informou a institución nun comunicado. Entre o plan de actividades para este ano, a Fundación salienta o inicio dun programa plurianual de rehabilitación e restauración da Catedral de Santiago, financiado con 3 millóns de euros. Durante o 2007, se comezará coa restauración do Pórtico da Gloria e das pinturas da Capela Maior da Catedral. Segundo a Fundación, trátase da campaña rehabilitadora "máis ambiciosa" que se acometeu na Catedral. No eido da cultura, a Fundación céntrase na arquitectura e no patrimonio cultural galego. Unha serie de exposicións temporais exclusivas para España, como '100 posters para un siglo', e unha reedición crítica dos Cancioneros, do inventario monumental e artístico de Galicia, e doutras xoias bibliográficas do servizo de publicacións da fundación completan o seu programa cultural. Dentro do ámbito investigador, a Fundación convocará proxectos en colaboración para documental, estudar, recuperar e difundir o patrimonio cultural e natural de Galicia. Os proxectos, que se financiarán con 400.000 euros, faranse públicos no mes de marzo. Ademais, no segundo semestre de 2007 presentaranse os resultados e publicacións dos proxectos culminados da convocatoria anterior: a investigación arqueolóxica en Chan do Cereixo, o xacemento máis antigo de Galicia e a clasificación dos protocolos notariais do Arquivo da Catedral de Santiago. Música A Fundación seguirá a ofrecer nas sedes da Coruña e Vigo unha programación diversa, estable e gratuíta con ciclos de música, cine e conferencias, exposicións temporais, obradoiros didácticos e seminarios. Dentro do XII Ciclo de Jazz, que se celebrará no mes de abril, actuarán "New Orleáns Parade" Traditional Jazz All Stars, Toshiko Akiyoshi Trio + Lew Tabackin, Cyrus Chestnut Trio +John Faddis, Eric Reed Trio, Dee Dee Bridgewater Malian Project, Lonnie Smith Trio e Miriam Aida Bossa Acoustic Nonet. Co gallo da celebración do 40 aniversario da fundación, programáronse unha serie de actividades relacionadas coa educación, como o I Encontro Peninsular de Asociacións de Becarios e Antigos Alumnos ou o ciclo de concertos a cargo de bolseiros de música, e coa cultura.