Dulce Pontes inaugura en Ourense un ciclo de Fundación Caixa Galicia sobre vocalistas lusófonas

A cantante portuguesa Dulce Pontes inaugura o mércores 14 de febreiro no Auditorio Municipal de Ourense un ciclo de concertos de vocalistas lusófonas, baixo o título "Lusofonías. Voces de mujer". A Fundación Caixa Galicia levará o ciclo por auditorios de Ferrol, Santiago, A Coruña e Lugo. Dulce Pontes iniciará así en Ourense a súa xira española, e volverá por Galicia para ofrecer un segundo concerto no Teatro Colón da Coruña, o 21 de febreiro. Ademais de Pontes, actuarán dentro deste ciclo algunhas das mellores artistas da canción portuguesa, como Mariza, Lura, Cristina Branco, Katia Guerreiro e Mafalda Arnauth. O auditorio da Fundación Caixa Galicia recibirá o 1 de marzo a Cristina Branco, coa súa mestura de fado tradicional, composicións propias e cancións populares portuguesas. O día 7, no Teatro Jofre de Ferrol e o 8 no Círculo das Artes de Lugo, Katia Guerreiro ofrecerá a oportunidade de escoitar en directo o fado clásico. Pola súa banda, a caboverdiana Lura actuará o 16 de marzo no Centro Sociocultural da Fundación Caixa Galicia en Santiago. O Auditorio Municipal de Ourense acollerá aínda outro espectáculo o día 22 de marzo, o de Mafalda Arnauth, que no seu último disco abandona o hermetismo do fado e lánzase a experimentar con outros rexistros musicais en obras de compositores estranxeiros. O ciclo rematará coa actuación de Mariza, que porá o broche de ouro á programación musical no Teatro Colón da Coruña o vindeiro 17 de abril.