AXUDAS

160 millóns ao sector agrogandeiro en axudas do primeiro Piar PAC

A Consellería do Medio Rural e do Mar, a través do Fondo Galego de Garantía Agraria (FOGGA), fará chegar este ano 160 millóns de euros ao sector agrogandeiro a través dos pagamentos directos do primeiro piar da Política Agraria Común. Destes pagamentos beneficiaranse uns 33.000 agricultores galegos. 

 O Diario Oficial de Galicia publicou esta semana a orde pola que se regula a aplicación destes pagamentos e das axudas ao desenvolvemento rural suxeitas ao sistema integrado de xestión e control. Estas son todas as axudas da PAC de aplicación en Galicia e que se pagan en base a superficies ou animais. 

 En relación aos pagamentos directos, a raíz da reforma da PAC aprobada a finais de 2013 aparecen novos pagamentos deste tipo (pago básico, pago verde, axudas asociadas para: vacún de leite, vacas nutrices, vacún de cebo, ovino-cabrún, etc.). 

Estas axudas fináncianse a través do Fondo Europeo Agrícola de Garantía (FEAGA). En canto ás axudas de desenvolvemento rural, é dicir, as do segundo piar da PAC, a Consellería fará chegar aos agricultores arredor de 25 millóns de euros anuais dos que se beneficiarán uns 8.500 agricultores. 

Este apartado cofinánciase mediante o Fondo Europeo Agrícola de Desenvolvemento Rural (FEADER) e comprende medidas do PDR de Galicia 2007-2013, en concreto, as indemnizacións compensatorias e os pagos das primas de mantemento asociadas ás axudas de forestación concedidas en anos anteriores, e do PDR de Galicia 2014-2020, que está en fase de aprobación pola Comisión Europea. Neste caso convócanse dúas axudas plurianuais que son as de Agroambiente e clima e as de Agricultura ecolóxica. 


Solicitudes 

Os interesados en cursala solicitude poderán consultar os requisitos e documentación esixida na orde que publicou o DOG o 11 de marzo. As solicitudes presentaranse exclusivamente por vía telemática, ben directamente polos interesados ou a través de entidades colaboradoras (bancos ou caixas de aforro que teñan sucursais abertas en Galicia, organizacións profesionais agrarias implantadas en Galicia e entidades de aconsellamento inscritas no Rexistro de Entidades con Servizos de Aconsellamento ou Xestión de Galicia -Resaxega-). 

O prazo para solicitar estas axudas esténdese ata o próximo 15 de maio. Para máis información, os interesados poden dirixirse ás Oficinas Agrarias Comarcais ou aos servizos territoriais do Fogga, así como asistir as charlas informativas que a Consellería do Medio Rural e do Mar está impartindo e impartirá nas próximas semanas.