COMUNICACIÓN / TV

O apagamento de canles de TDT farase na madrugada do martes

Na madrugada do luns ao martes, efectuarase o apagado das frecuencias daquelas canles que están a emitir en dobre frecuencia: a vella, que é a que utilizaban antes do pasado mes de outubro, e a nova, a que utilizan desde entón e que a partir do 1 de abril quedará como definitiva. 

As canles autonómicas V Televisión, TVG e TVG2 están entre elas nas áreas que dependen de Meda e Ares, onde as vellas frecuencias desaparecerán. A partir dese momento, aquelas persoas que estean sintonizando as canles a través das frecuencias antigas poderían perder algúns sinais, algo que variará en función da zona. 

Só aqueles edificios comunitarios que non realicen a adaptación da antena colectiva perderán de forma definitiva algunhas canles, que só poderán recuperar contratando a un antenista para actualizar o seu receptor e, posteriormente, resintonizando os seus televisores.