Feijóo: "Galicia está do lado da solidariedade, dos vínculos e da ausencia de discriminacións"
O titular do Goberno galego, Alberto Núñez
Feijóo, afirmou hoxe que na súa condición de nacionalidade histórica, “Galicia
está do lado da solidariedade, dos vínculos e da ausencia de discriminacións”.
Durante a presentación de José Antonio Monago
no marco do almorzo informativo organizado por Nueva Economía Fórum, Feijóo
afirmou que ante cada novo proxecto ou ocorrencia en torno á reforma
territorial do Estado, as preguntas han de ser sempre as mesmas: incrementa ou
diminúe a solidariedade?; estreita vínculos ou fainos máis tenues?; asocia
asimetrías con privilexios?, ao que engadiu que España faise sumando,
“comunidade a comunidade”.
Nesta liña, e fronte aos que poñen en
cuestión esta idea, o presidente da Xunta de Galicia lembrou o momento
histórico do 78, “no que a historia de España se desvía do que parecía un curso
natural que a levaba de enfrontamento en enfrontamento, para encarrilarse cara ao
entendemento”, dixo, logo de precisar que desde “a revolución do 78”, España
multiplicou talento, convivencia, desenvolvemento e benestar.
Para que iso se perpetúe, Feijóo afirmou que
o político democrático ha de reunir as doses axeitadas de corazón e cabeza, xa
que “sen ideas e sen principios –aseverou-, a política democrática ten os
alicerces débiles e está exposta ás mensaxes dos falsos mesías”.
O responsable autonómico concluíu a súa
intervención referíndose a José Antonio Monago como un presidente dunha
comunidade que atesoura experiencia en todas as administracións e que gobernou
Estremadura con corazón e con cabeza, con paixón e pragmatismo, e con ilusión e
realismo.