Feijóo: "Galicia sitúase a cabeza das comunicadas con máis deducións para favorecer a natalidade"

O presidente da Xunta, Alberto Núñez Feijóo, subliñou hoxe no pleno do Parlamento que Galicia se sitúa á cabeza das comunidades autónomas con máis deducións fiscais para favorecer a natalidade, cun aumento este ano da dedución fiscal ata os 1.200 euros anuais no caso do segundo fillo, e ata os 2.400 no caso do terceiro ou sucesivo.
 
En resposta ás preguntas do grupos parlamentarios, Feijóo resaltou que esta iniciativa se complementa con outras medidas como o incremento nun 70% do número de prazas públicas de escolas infantís -“e por primeira vez estamos na ratio europea de 33 prazas por cada cen nenos-; a implantación da flexibilidade horaria e o teletrabrallo para os empregados públicos; e o incremento do permiso de paternidade. 
 
Se ben recoñeceu que o problema do envellecemento da poboación é un problema común ao resto de España e de Europa, o titular do Executivo autonómico incidiu no compromiso do Goberno galego nesta materia, reflectido no Plan de dinamización demográfica.
 

Concellos máis solventes e máis útiles para os cidadáns

Sobre a situación actual dos concellos, Feijóo aseverou que hoxe os municipios de Galicia son máis solventes e máis útiles para os cidadáns. E, nesta liña, destacou a cooperación entre a Administración autonómica e a Federación galega de municipios nos temas de maior importancia para os concellos.
 
“Pactamos coa Fegamp os grandes temas que afectan os concellos”, incidiu, referíndose á reforma da Lei do solo, á reforma das normas de hábitat, á implantación da Administración electrónica, á estabilización do fondo de cooperación local e á xeneralización dos anticipos nas subvencións dos entes locais.
 
Así, e máis polo miúdo, o titular do Executivo autonómico lembrou que, no eido da Sanidade, “a Xunta asumiu en plena recesión económica 51 centros de saúde; condonaremos o 50% das débedas que tiñan co consorcio de servizos sociais do bipartito; pactamos coa Fegamp o novo mapa de emerxencias da Comunidade e puxemos á disposición dos concellos a rede dixital; no eido do transporte, puxemos a funcionar os plans de transporte metropolitano na Coruña, Santiago, Lugo, Ferrol e Vigo; mantivemos o fondo de cooperación local a pesar da baixada dos ingresos da Comunidade; e adaptamos a Lei de réxime local aos problemas de Galicia”.
 
Ademais crear novos instrumentos financeiros coma o canon eólico, que achegou ás arcas municipais galegas 40 millóns de euros, Feijóo precisou que a suma total das transferencias realizadas desde a Xunta aos concellos o pasado ano alcanzaron os 300 millóns.
 
No tocante á situación económica, o responsable autonómico subliñou que, pese a atopar unha Galicia que destruía 51.000 postos de traballo no último ano do Goberno bipartito, no ano 2014 comezaron a mellorar os datos do emprego neto “e, no 2015 estamos a crear emprego”. “Temos o mellor mes de abril desde que hai serie histórica. O paro en Galicia baixou un 9,4%, dous puntos máis que a media de España, e temos menos paro rexistrado en abril de 2015 que en abril do 2011”, dixo.