SISTEMA UNIVERSITARIO DE GALICIA
A Xunta renova a colaboración coas universidades
A
Vicepresidencia da Xunta vén de renovar o convenio de colaboración co Sistema
de Universidades Galegas para a consolidación da Rede Galega de Cooperación
Universitaria para o Desenvolvemento, cunha achega de máis de 100.000 euros.
O obxectivo
principal deste convenio é mellorar o posicionamento do Sistema Universitario
de Galicia a través do apoio á consolidación da Rede Galega de Cooperación
Universitaria para o Desenvolvemento (RGCUD), como un instrumento de
dinamización e apoio da Cooperación Universitaria para o Desenvolvemento (CUD)
e da Educación para o Desenvolvemento (EpD).
A Xunta,
seguindo esta liña de axudas, achegará un total de 102.633 euros as tres
universidades que conforman o SUG (Universidade de Vigo, Universidade de
Santiago de Compostela e Universidade da Coruña). O convenio asinado, polo que
se renova esta colaboración, regula as condicións que rexerán a cooperación
entre ambas entidades.
Esta non é a
primeira vez que a Xunta e as universidades galegas traballan xuntas en materia
de cooperación para o desenvolvemento. Entre os anos 2004-2011, o Goberno
galego colaborou coa USC e a UDC para a realización de actividades de formación
e sensibilización en materia de cooperación para o desenvolvemento no ámbito universitario,
achegando máis de 850.000 euros.
O Sistema
Universitario Galego ten un gran potencial na xeración do coñecemento experto,
así como unha capacidade notable para constituírse en espazos de formación,
tanto de saberes técnicos como de valores cidadáns. Estas calidades converten
as universidades nun axente de cooperación fundamental de cara á consecución do
obxectivo xeral de incrementar o apoio á investigación e á formación no sector
da cooperación.
Esta colaboración
enmarcase no III Plan Director de Cooperación Galega 2014-2017, que aposta polo
fortalecemento do papel das universidades para apoiar a formación e
capacitación especializada e para a promoción da investigación no ámbito
universitario.