Susana López Abella abriu as XV Xornadas Mulleres en Acción
A secretaria
xeral da Igualdade, Susana López Abella, inaugurou esta tarde as XV Xornadas
Mulleres en Acción: U-las actrices?, onde reivindicou a non discriminación e a
igualdade das mulleres no mercado laboral.
No marco da
inauguración, López Abella resaltou a necesidade de defender a igualdade de
oportunidades nos postos de dirección e decisión, promover unha imaxe non
sesgada e máis real da muller nos medios audiovisuais e fomentar a presenza
paritaria de mulleres en todas as áreas públicas relacionadas cos medios
audiovisuais.
A secretaria
xeral da Igualdade tamén quixo incidir no que atinxe a brecha salarial en
Galicia entre mulleres e homes, pois, segundo o INE, mentres que no ano 2013 os
salarios dos varóns decreceron nun 2,1 por cento o das mulleres é aínda máis
acusado, cun descenso do 3,2 por cento. Neste mesmo ano, o 10,2 por cento dos
varóns tivo ingresos salariais menores ou iguais ao salario mínimo
interprofesional, fronte ao 18,5 por cen das mulleres. Os datos de ocupación, a
nivel nacional, son aínda máis críticos, só o sete por cen dos directores, o
quince por cento dos produtores e o dez por cen dos guionistas son mulleres.
Neste senso,
recordou discursos de actrices de renome como Patricia Arquette ou Cate
Blanchet nos que tamén denunciaban a diferencial salarial, as preguntas
constantes sobre a súa condición de nai e actriz, aducindo que esta era unha
cuestión que só se formulaba ás mulleres, e onde recordaban a loita histórica
polos dereitos de todos os colectivo, sendo este o momento de loitar polos das
mulleres.
Dende a
secretaría xeral da Igualdade traballase para camiñar cara unha cultura
igualitaria e con perspectiva de xénero, sendo, o obxectivo desta xornada, o de
sensibilizar o sector e reflexionar sobre a brecha laboral que, en pleno século
XXI, padecen as profesionais das artes escénicas e do audiovisual no só en
Galicia, senón tamén en España, Europa e nos EEUU.