GASTO PARA 2016

A Xunta aproba un teito de gasto de 8.873 millóns

O presidente do Goberno galego, Alberto Núñez Feijóo, destacou hoxe a aprobación do teito de gasto para 2016, fixado en 8.873 millóns de euros –un incremento do 5,2% respecto ao pasado ano, é dicir, de 438 millóns máis-, permitirá volver baixar os impostos, seguir devolvendo aos empregados públicos o esforzo feito e mellorando os servizos públicos, e impulsar a actividade económica.   

Durante a rolda de prensa do Consello, Feijóo subliñou a importancia de elaborar un teito de gasto “que permite evitar que volvamos caer en eivas do pasado, e garantir que as contas públicas galegas se fagan con realismo, responsabilidade e, sobre todo, con transparencia”.   

Nesta liña, o titular da Xunta afirmou que “desde que chegamos ao Goberno en 2009, actuamos con responsabilidade e con realismo: fomos responsables e realistas cando reducimos os presupostos públicos; fomos responsables e realistas despois, cando conseguimos estabilizar as contas públicas; e, agora, imos seguir sendo responsables e realistas, porque ser responsables e realistas significa tamén ser conscientes de que agora temos unha mellor situación económica, de que os ingresos da Administración pública van subir e de que temos que aproveitalo para facer cousas”.   

“Ser responsable e realista suporá en 2016 contar cun teito de gasto público que sinala sen dúbida, desde o punto de vista de presupostos da Xunta, a recuperación económica e social da Comunidade”, engadiu. E, logo de precisar que se trata do teito de gasto maior de todos os aprobados e que sobe por primeira vez, expresou a vontade de aproveitar a maior capacidade de gasto para reforzar o compromiso cos galegos de hoxe pero tamén cos galegos do mañá; “e, polo tanto –aseverou-, sen renunciar ao cumprimento do déficit e a seguir reducindo a dependencia da débeda pública, dunha forma clara e contundente”.   Neste contexto, o responsable autonómico aseverou que Galicia vai seguir blindando a solvencia e cumprindo o déficit fixado para o próximo ano, “que é o máis baixo de toda a serie, un 0,3%”. E seguirase afondando no compromiso de desprenderse progresivamente da dependencia do endebedamento.   

Sobre este segundo aspecto, Feijóo precisou que o teito de gasto inclúe a previsión de reducir o recurso de débeda pública a máis da metade respecto a este ano 2015. “Isto supón que somos a comunidade onde menos se incrementou a débeda pública desde 2008”, matizou.   


Recuperación e emprego 

Ao longo da súa intervención, o presidente da Xunta incidiu tamén na importancia de ter aprobado un teito que non só consolida a estabilización das contas que se logrou nos últimos anos, “freando definitivamente a caída abrupta que acumulamos durante os anos 2009, 2010, 2011, 2012 e 2013”; senón que por primeira vez “incrementa de forma substancial a  capacidade de gasto”.   

“Teremos unha maior capacidade de gasto non porque se incremente a débeda pública, senón porque se incrementarán os ingresos”, afirmou, ao que engadiu que esta maior capacidade de gasto permitirá volver a baixar impostos e con moita máis intensidade; non ter que pedir novos esforzos aos empregados públicos, senón devolverlles os que fixeron; seguir mellorando os servizos públicos, “e daremos axudas directas para as familias que teñan os seus fillos nunha gardería ou cun coidador”; e impulsar a actividade económica.   

No tocante a este último punto, Feijóo aseverou que o obxectivo é ser capaces de dar continuidade á tendencia de recuperación. “O teito de gasto que aprobamos é unha aposta por afianzar a recuperación”, dixo, salientando que en 2016 a previsión de crecemento do PIB  se valora nun incremento do 2,4%.   Así mesmo, e en relación ao desemprego, asegurou que o obxectivo de paro é do 18,3% para o vindeiro ano, “case dous puntos por debaixo do obxectivo de paro do Goberno español”.   

Con estas bases, o Goberno galego remitirá con carácter inmediato este teito de gasto ao Parlamento de Galicia, sendo unha das poucas comunidades que o somete ao criterio da Cámara e, sendo a Autonomía que antes presenta o seu marco orzamentario para 2016.   

Pola súa banda, o conselleiro de Facenda, Valeriano Martínez, fixo fincapé en que este incremento do teito de gasto permitirá poñer en marcha “políticas para intensificar a creación de emprego en Galicia”, co obxectivo de trasladar a recuperación económica aos cidadáns, para que se beneficien desta mellor situación. “E propoñemos acadar estas metas coa maior capacidade de gasto desde que a Xunta aproba este límite”, sinalou.