ESQUERDA UNIDA
Yolanda Díaz: "Grazas as políticas de emprego do PP, os traballadores teñen que firmar contratos baseados na miseria"
A temporada estival é
unha das épocas que permite unha alentadora lectura para o mercado laboral. As
vacacións ou o turismo fan que o traballo temporal, concretamente o relacionado
co sector da hostalería, descenda (en case un 70%) as cifras do paro en
Galicia, onde 12.691 persoas atoparon traballo no pasado mes de xullo.
No entanto, dende Esquerda Unida queremos recalcar que
esta cifra non pode venderse xamais como un “éxito ou avance”, senón todo o
contrario: é un serio retroceso en
dereitos laborais e un reflexo do fracaso das políticas de emprego do Partido
Popular, nas que os contratos temporais e precarios que se firman na
actualidade fan que atopar un traballo digno, hoxe en día, sexa unha utopía.
“Que tipo de emprego
queremos crear, escravo ou traballo de calidade?”, pregúntase Yolanda Díaz, coordinadora nacional de
Esquerda Unida. Para ela, a lectura dos datos de emprego está moi clara. “A proporción de traballadores con contrato
temporal aumentou notablemente durante o goberno do PP. A duración dos novos
contratos temporais é de 54 días de media, cando en 2008 era de 78 días”, apunta.
“Agora, grazas as políticas de emprego
do PP, os traballadores e as traballadoras teñen que firmar contratos baseados
na miseria, precaridade e a desigualdade, contratos que rematan cos dereitos
fundamentais das persoas ”, sinala.
Este mes tamén é
especialmente cruel en termos de xénero. De acordo cos datos feitos públicos
polo Ministerio de Emprego e Seguridade Social, as mulleres concentran o maior
número de desemprego en Galicia, un total de 117.771 fronte a 98.600 no caso
dos homes.
Para Díaz, “moitas mulleres traballadoras viven hoxe
situacións de extrema precariedade. A maioría conforman o último elo da cadea laboral, sofren
sobreexplotación e cada vez están máis desprotexidas dos abusos empresariais”. “Amais,
as medidas de austeridade do PP conducen a moitas mulleres ao traballo
mergullado. Neste senso, de continuar coas actuais políticas neoliberais de
desregulación das condicións de traballo e de recorte dos salarios, tristemente,
nunca chegaremos a acadar a igualdade”, remata.