Besteiro: "Para Francia o sector do leite é estratéxico e para Rajoy e Feijóo nunca o foi"
O secretario
xeral dos socialistas galegos, José Ramón Gómez Besteiro, acudiu esta mañá á
manifestación e tractorada do sector lácteo en Vilalba. “Para Francia, o sector
do leite é estratéxico, e para o PP en España e en Galicia nunca o foi, e este
é o resultado”, afirmou Besteiro, que reclamou “solucións políticas a un
problema político”. O socialista resaltou que ata a ministra lle botou esta semana
un “rapapolvo esperpéntico” a Feijóo, ao trasladar “que exerza as súas
competencias e que nos últimos meses non o estivo a facer”.
O líder dos
socialistas galegos definiu como “unha auténtica catástrofe” a situación do
medio rural galego, e lembrou que Feijóo non quixo ver o problema do que xa lle
advertiron hai tempo. “Hai un ano os socialistas anunciabamos que coa
finalización das cotas lácteas o goberno tería que estar preparado e poñer
medios para estalo, e se nos dicía que eramos uns catastrofistas”, apuntou. “É
máis, Feijóo asegurou que os prezos subirían e que a situación de bonanza
voltaría ao medio rural galego. Un ano despois a situación está peor” dixo. “É
unha situación que require solucións políticas a un problema político, e un
forte compromiso co medio rural”.
“Para Francia, o
sector do leite é un sector estratéxico, para o PP en España e en Galicia nunca
o foi, e este é o resultado que acadamos agora. A desvalorización, a perda
económica, a ruina para as explotacións gandeiras, e seguen sen ter unha
resposta política a un problema político”, insistiu, para o que demandan
“implicación” e que “deixen de poñer excusas legais, porque non existen”.
“Francia actúa e
faino en beneficio dos seus gandeiros. O Goberno do PP, de Rajoy e de Feijóo, desatende
un problema vital , porque segue sen considerar o mundo do rural, o mundo dos
gandeiros e o do leite como un valor estratéxico para o noso país”, afirmou
Besteiro, que pediu “un goberno que pise forte en Europa, que defenda os
intereses dos nosos gandeiros”, e non “un goberno da Xunta que, como dixo a
ministra, non está a facer o seu traballo”. “O rapapolvo desta semana da
ministra para a comunidade autónoma de Galicia é absolutamente esperpéntico.
Dille ao PP que exerza as súas competencias e que durante estes últimos meses
non o estivo a facer”, concluíu.
Saúdos, Comunicación PSdeG-PSOE