Xunta e universidades asinan o "histórico" acordo de docencia clínica de Medicina

O presidente da Xunta, Alberto Núñez Feijóo, subliñou hoxe que o convenio de colaboración para a Docencia Clínica de Medicina ten como obxectivo primordial fortalecer a educación e a sanidade pública en Galicia. Así o expresaba o responsable autonómico tras presidir, acompañado polos conselleiros de Cultura, Educación e Ordenación Universitaria, Román Rodríguez, e o de Sanidade, Jesús Vázquez, o acto de sinatura do convenio de Docencia Clínica.   

Como engadiu Feijóo, trátase dun acordo histórico, froito da unión, da concertación e da intelixencia e que non tería sido posible sen a xenerosidade e sen a altura de miras amosada polos reitores das Universidades de Santiago, Juan Viaño; de Vigo, Salustiano Mato; e da Coruña, Xosé Luís Armesto.   

Segundo o presidente da Xunta, o dito acordo reforza as sinerxías entre o Servizo Galego de Saúde e o Sistema Universitario de Galicia para dar cumprimento a un obxectivo que prevalece sobre calquera outro: fortalecer a educación pública galega e fortalecer a sanidade pública. Con este convenio, o titular do Goberno galego recalcou que non só se mellora a docencia da Medicina na Comunidade, senón que, á súa vez, fórmase unha canteira de futuros profesionais do Servizo Galego de Saúde máis preparados e cualificados, de acordo aos novos retos da ciencia médica.   


A Facultade de Medicina da USC, a única que imparta o Grao de Medicina 

O presidente da Xunta explicou este convenio descentraliza a docencia clínica do grao de Medicina da Universidade de Santiago, de xeito que a partir do curso 2015-2016 o profesorado das universidades de Vigo e A Coruña que imparte clase en titulacións vinculadas á área da saúde, tamén poderá facerse cargo da docencia clínica do grao de Medicina nos respectivos hospitais universitarios.   

Regula, así, aspectos como os procedementos de colaboración entre centros, ou o réxime xurídico do persoal colaborador e dos profesionais sanitarios contratados que se incorporan á docencia universitaria. Pero, por outra banda, este texto ratifica ademais que será a Facultade de Medicina da USC a única que imparta o Grao de Medicina no Sistema Universitario de Galicia, outorgándolle exclusivamente a este centro a plena responsabilidade académica sobre esta titulación.     

Deste xeito, a Facultade de Medicina compostelá encargarase de planificar e coordinar a docencia de todos os estudantes deste grao nos diferentes espazos nos que se imparte. Por outra banda, Feijóo fixo fincapé en que este acordo ten tras de si o traballo conxunto das consellerías de Educación e de Sanidade e as tres universidades galegas. Neste senso, cre que non cabe dúbida de que así é porque dá unha resposta definitiva e equitativa ás demandas que viñan realizando os tres campus no tocante á impartición desta titulación e porque optimiza todos os recursos dos que dispón o Servizo  Galego de Saúde e a propia universidade para poñelos ao servizo do ensino, do alumnado; e, polo tanto, en beneficio non só da sanidade, senón tamén da investigación médica.   

Do mesmo xeito, Feijóo apuntou que se trata dun acordo de gran simbolismo porque nace da unidade de acción entre as tres universidades (USC, UDC e UVigo) para facer de Galicia un referente na docencia da Medicina.   


Plan de financiamento universitario 2016-2020 

Por outra banda, Feijóo destacou que o mesmo espírito construtivo e a mesma vocación de servizo e de cooperación do convenio son as que tamén se pretende que estean presentes no Plan de financiamento universitario 2016-2020, que a vindeira semana se someterá á aprobación do Consello Galego de Universidades para que, posteriormente, sexa aprobado polo Goberno de Galicia.   

Trátase dun plan que deseña un marco de estabilidade financeira para as tres universidades galegas ata o vindeiro lustro, e que reflicte o compromiso dos impostos dos galegos co sistema universitario dos galegos.   

Así mesmo, o plan consigna ata o ano 2020 unha dotación de case 2.480 millóns de euros de financiamento público, e supón o maior esforzo orzamentario da historia de Galicia en favor das tres universidades públicas. É dicir, este plan aumenta o orzamento inicialmente fixado, o que significa un incremento de 374 millóns con respecto á cantidade contemplada no anterior.   

E ademais, como destacou Feijóo, é un documento que achega máis transparencia na xestión e orienta o financiamento á consecución de resultados. Responde, en definitiva á idea de que apostar pola educación superior é apostar polo progreso e polo futuro dun país.