NO 2016
O Banco de Terras manterá os prezos para o arrendamento de fincas
O Banco de Terras manterá no 2016 os prezos de
referencia para o arrendamento de fincas, co fin de seguir favorecendo a
mobilidade e o acceso á terra agrícola e gandeira. Así o aprobou por
unanimidade, na súa última xuntanza de traballo, a Comisión Técnica de Prezos e
Valores. Neste órgano, presidido polo director xeral de Desenvolvemento Rural,
Antonio Crespo, están representadas as organizacións profesionais agrarias, a
Federación Galega de Municipios e Provincias, a Dirección Xeral do Catastro, as
cooperativas e distintos departamentos da Xunta de Galicia.
Nesta encontro expuxéronse as actividades
levadas a cabo polo Banco de Terras no último ano e, para as fincas que se
arrenden no vindeiro 2016 a través desta ferramenta, acordouse o mantemento dos
prezos de garantía e referencia vixentes no ano 2015. Tamén se valorou de xeito
positivo o resultado dos cambios levados a cabo no 2015 por esta comisión nos
prezos de referencia, unha vez os mesmos se aproximaron á realidade dos prezos
ofertados polos gandeiros e agricultores á hora de optar a unha finca do Banco
de Terras.
Na xuntanza informouse de que se está
traballando nunha nova metodoloxía para a valoración e taxación dos predios de
titularidade da Axencia Galega de Desenvolvemento Rural (AGADER). Este
traballo, xunto co resultado do proxecto denominado “Propiedade, mobilidade de
terras e valorización territorial”, realizado por AGADER, a Fundación Juana de
Vega e a Universidade de Santiago de Compostela, presentado no primeiro
trimestre de 2015, deberá ser tido en conta á hora de abordar futuras
evolucións de prezos.
O director xeral de Desenvolvemento Rural
aproveitou para expoñer a necesidade de chegar a consensos co fin de favorecer
a mobilidade das terras e favorecer así o redimensionamento das explotacións,
tendo como finalidade a loita contra o abandono e seguir apoiando o sector
primario.