PONTEVEDRA
A Xunta demanda a Ence máis inversións ambientais
A conselleira
de Medio Ambiente e Ordenación do Territorio, Beatriz Mato, asegurou hoxe que a
Xunta estará moi vixiante no cumprimento estrito de todos os compromisos
adquiridos por Ence para a súa factoría de Pontevedra, moi especialmente no
referido á parte ambiental, un eido no
que “non só nos quedaremos no xa comprometido, senón que esixiremos máis”,
incidiu Mato.
Por
iso, hoxe mesmo, anunciou a conselleira, “veño de manter unha reunión con responsables
de Ence aos que lles solicitei un maior compromiso en materia ambiental,
especialmente no eido da depuración na zona de Pontevedra e a posta en marcha
de novos proxectos no eido forestal, así como información directa e concreta
sobre o cronograma de investimentos contemplados na solicitude de prórroga”.
Así
mesmo, nesa reunión, Mato pediu ademais a axilización dos proxectos xa
anunciados, co obxectivo de que todos poidan estar iniciados antes do mes de
agosto. A
titular do departamento autonómico lembrou hoxe no pleno do Parlamento que Ence
cumpre os parámetros ambientais e que isto deberá seguir sendo así porque, para
continuar coa súa actividade, a factoría terá que cumprir as novas esixencias
da Unión Europea, condicións que cada vez son máis esixentes. Nese sentido,
avanzou que antes de outubro de 2018 terá que someterse a unha nova revisión e
avaliación das condicións ambientais.
Autorización de permanencia
Beatriz
Mato aclarou que o que a Xunta fixo, en relación coa concesión de prórroga de
Ence, foi cumprir coas súas obrigas emitindo o informe ambiental solicitado
polo Ministerio, “non foi unha resolución da Administración autonómica”. O
papel da Xunta neste proceso limitouse a dar resposta a unha solicitude do
Estado para dar conta dos requisitos ambientais da autorización coa que conta
Ence desde 2008.