Ana Pontón aposta por un “debate sereno” de cara á “refundación” do BNG
A deputada Ana Pontón, que encabeza unha
das dúas listas para o Consello Nacional, fai un chamamento á participación na
Asemblea Nacional do domingo 28 de febreiro e confía en que nela se produza un “debate
sereno, tranquilo e sosegado do que saia o BNG como unha organización viva de
cara a afrontar os debates políticos do futuro”.
Pontón defende, como militante
nacionalista, que “é vital manter o proxecto nacionalista tamén na súa
expresión electoral e, aínda que o BNG deba ter unha estratexia poselectoral co
fin de mudar o goberno da Galiza non pode participar en proxectos capitalizados
por iniciativas estatais”. No discurso en que defenderá a candidatura que
encabeza, Ana Pontón apostará por manter a “autorganización con espazos de
decisión non subordinados ás directrices de Madrid, optando pola
autodeterminación nos ámbitos que dependen de nós. Trátase, en definitiva, de
que tomemos as rendas do noso futuro, ver o mundo desde a nosa realidade lonxe da
subordinación que estamos a ver noutras alternativas políticas”.
Confía tamén a candidata á portavocía que
na asemblea se produza un debate profundo e aberto en que se recoñezan os erros
propios e se abran novos camiños de cara ao futuro, mostrando máis unha vez a
condición democrática e participativa do BNG. “Que o debate sexa tan real e
profundo como necesitan estes tempos en que temos que ter presentes as
perspectivas do futuro, cunha posíbel repetición das eleccións xerais e a
incógnita de cando serán as do Parlamento Galego. O proceso de refundación do
BNG ten, por obriga, que ter en conta este contexto”, defende Pontón dunha
decisión que recae na militancia “de forma libre e democrática”.
“Coñecemos as dificultades mais, entre
todos e todas, temos que afrontar o futuro con enerxía, valor e optimismo
porque o que nos une no BNG é esa confianza en que o nacionalismo ten que ter
futuro polo ben da Galiza”, apunta a poucas horas de defender a listaxe coa que
concorre á XV Asemblea Nacional do BNG e que está composta tamén por Goretti
Sanmartín Rei, Xosé Luís Rivas Cruz “Mini”, Noa Presas Bergantiños, Rubén Cela
Díaz, Carme da Silva Méndez, Yéssica García ou Luís Pérez Barral nos seus primeiros postos. Departamento de Comunicación