EN 2015
Galicia rexistrou máis de 150.000 sinistros por seguros agrarios
Ao longo de 2015 declaráronse en Galicia un
total de 156.607 sinistros relacionados cos seguros agrarios e pagáronse
indemnizacións por valor de máis de 21 millóns de euros. A Consellería do Medio
Rural achegou 4.750.000 euros para financiar estas coberturas, cantidade
idéntica á destinada no 2016.
Estes datos foron analizados nunha xuntanza de
traballo mantida entre a directora xeral de Gandaría, Agricultura e Industrias
Agroalimentarias, Belén do Campo, e Ramón Martín, director territorial para o
Noroeste de Agroseguro, a entidade encargada polo Ministerio de Agricultura,
Alimentación e Medio Ambiente para xestionar as liñas de seguros agrarios.
Estas pólizas agrarias dan cobertura aos danos
rexistrados nos diferentes cultivos, nas explotacións e pola retirada e
destrución de cadáveres de gando. En relación con este último aspecto, nesta
reunión avaliouse a posibilidade –comprometida pola directora xeral– de estudar
o incremento da porcentaxe de axuda que aporta a Consellería para o sector
cunícola, dado o incremento do custo que se deu nestes últimos anos, por riba
da medida do resto de sectores.
As principais liñas de seguros agrarios en
Galicia, por número de pólizas, corresponden precisamente á retirada e
destrución de cadáveres, seguidas das que dan cobertura ás explotacións (sobre
todo de gando vacún) e por último as referidas aos cultivos.
Nesta xuntanza de traballo avaliouse tamén a
colaboración entre a Consellería e Agroseguro de cara a celebración, na próxima
quincena de maio en Galicia, dun encontro sobre a nova campaña de seguros
agrarios.