Máis de 2000 doazóns de sangue na campaña "Imposible sen ti"
A campaña especial de
doazón de sangue “Imposible sen ti” concluíu esta fin de semana cun total éxito
de participación, xa que foron 2.193 doazóns de sangue rexistradas, das cales
251 (o 11,5%) correspondíanse con cidadáns que doaban por vez primeira.
O excelente resultado
desta campaña, impulsada polo Centro de Transfusión de Galicia (CTG)-Axencia
Galega de Sangue, Órganos e Tecidos, en colaboración co RC Celta de Vigo e o RC
Deportivo da Coruña, e que principiou o pasado mércores 23 de marzo, ten
permitido afrontar un período especialmente delicado para a doazón de sangue,
como as xornadas inmediatamente anteriores e posteriores ás datas festivas de
Semana Santa.
Participación
solidaria
Dende o inicio da
campaña, as unidades móbiles e puntos fixos de doazón da Axencia Galega de
Sangue, Órganos e Tecidos efectuaron máis dunha vintena de desprazamentos nas
cidades da Coruña e Vigo e concellos limítrofes, rexistrando a asistencia de
2.546 cidadáns, dos cales puideron doar 2.193 (o 86% dos presentados).
Esta elevada
participación supuxo duplicar o volume de doazóns obtido no mesmo período do ano
2015, circunstancia que ratifica o éxito desta iniciativa e que evidencia o
carácter xeneroso e solidario dos cidadáns galegos, así como o compromiso
solidario dos dous representantes galegos da máxima categoría do fútbol
nacional.
Un obxectivo común
A campaña “Imposible
sen ti” impulsada polo Celta e polo Deportivo supuxo unha iniciativa sen
precedentes no ámbito nacional, xa que xamais ata este momento dous equipos de
máxima categoría do fútbol nacional e ás portas dun derbi autonómico de máxima
rivalidade deportiva, unían as súas forzas a prol dun obxectivo común: promover
unha conciencia solidaria en favor da doazón de sangue.
Neste sentido, a
Axencia Galega de Sangue, Órganos e Tecidos quere transmitir o seu máis sincero
agradecemento ás directivas, corpo técnico, xogadores e seareiros do RC Celta
de Vigo e do RC Deportivo da Coruña por colaborar xenerosa e altruístamente no
desenvolvemento desta iniciativa, que non só acadou o seu obxectivo inicial,
senón que desbordou todas as expectativas.
Ademais, fai
extensivo este agradecemento aos medios de comunicación que contribuíron a dar
información sobre esta campaña e a todos os cidadáns que participaron
activamente en “Imposible sen ti”, ademais de todos aqueles que, nalgún momento
das súas vidas, teñen doado un pouco do seu sangue para que moitos enfermos
podan solucionar o seu problema de saúde e, mesmo, salvar a vida.