EN MOAÑA
Efectivos de emerxencias traballan na extinción dun lume nunha nave industrial
Efectivos de distintos corpos de emerxencias
traballan arestora para tentar controlar e extinguir un lume que se orixinou
nunha nave industrial no concello pontevedrés de Moaña. O 112 tivo constancia
do incendio, que ten lugar no lugar de Verdeal, na parroquia de Domaio, contra
as 18 horas, e polo momento descoñécense as causas do lume, que presumiblemente
se iniciou nunha estancia situada na parte alta da nave.
Ante a posibilidade de que se producise
algunha fuga dalgún material químico cos que se traballaba na nave, como
amoníaco, vense de activar o Plan territorial de emerxencias de Galicia
(Platerga) no seu nivel 1. Do mesmo xeito, tamén se activou o Plan de
contaminación mariña de Galicia (Camgal) en fase de alerta, ante a posibilidade
de que se produza un episodio contaminante.
O Centro de Atención ás Emerxencias 112
Galicia mobilizou de inmediato os bombeiros do Morrazo, de Vigo, do Baixo Miño
e do Salnés- Ribadumia, que enviaron dotacións ao lugar e que traballan nos
labores de extinción, especialmente para evitar que o lume se propague ao resto
das instalacións. Tamén se puxeron os feitos en coñecemento da Policía Local,
de Protección Civil e da Garda Civil e o Grupo de Apoio Loxístico da Axencia
Galega de Emerxencias está en alerta por se fose precisa a súa mobilización.
O lume está a provocar unha intensa fumareda
que provocou problemas de visibilidade en vías como a autoestrada AP-9, sendo
tamén informada a Garda Civil de Tráfico, que confirmou o corte desta vía á
altura de Rande. Así mesmo, levouse a cabo dende o primeiro momento a
evacuación dos traballadores da nave e posteriormente se ten advertido aos
veciños da zona que tomen as medidas de autoprotección precisas, como que
permanezan nas súas casas e pechen portas e fiestras, dada a proximidade da
nube de fume ás súas vivendas.
Ata o lugar desprazáronse a conselleira do
Mar, Rosa Quintana, e o director xeral de Emerxencias, Luis Menor. No marco do
Camgal decidiuse enviar á zona o buque Irmáns García Nodal, e ata alí tamén acudiron
un equipo do Plan de control de verteduras de Augas de Galicia e técnicos de
Calidade Ambiental para facer medicións da calidade do aire e das augas.