Méndez Romeu: "Temos a forza e a convicción de que somos quen de afastar ao Goberno do PP"
Vigo. O
candidato ás primarias do PSdeG-PSOE continúa participando en diversos actos
con militantes. Nesta ocasión, visitou o concello de Negreira e mantivo reunións
con socialistas de Redondela, Vigo e A Guarda. Na cidade olívica, José Luis Méndez Romeu, foi presentado polo
alcalde de Vigo, Abel Caballero, quen loou a súa traxectoria e a súa longa relación
de amizade.
Ante un auditorio de máis de 300 persoas, Méndez Romeu referiuse
ao impacto que ten a posición política de Vigo en España: “En toda Galicia se
escoita con atención a Abel Caballero e sábeo ben Núñez Feijóo”. Acto seguido,
explicou os motivos que lle levaron a presentar a súa candidatura ás primarias
do PSdeG-PSOE: “Quero deixar claro que non me presento para dar unha batalla
interna, senón para presidir a Xunta de Galicia e acabar coa dereita.
Preséntome para acabar con este pesadelo, que leva xa sete anos”.
O portavoz parlamentario sinalou que foron diversos
colectivos e persoas os que lle pediron que se presentara, e agora “as
primarias son o primeiro paso deste camiño que nos ten que levar á Xunta”.
Neste intre, criticou con dureza a política do PP baseada na desigualdade, nunha
clase media arruinada e nos ataques continuos aos asalariados.
Destacou, así
mesmo, que o PP fixo recortes drásticos en sanidade e educación, que suprimiron
axudas sociais e fomentaron a desigualdade. “Hoxe xa non hai contratos estables
e, que non haxa dúbida, haberá persoas que nunca terán dereito a pensión debido
as políticas da dereita”, dixo.
Para o socialista, ese é o modelo de relacións
laborais de Feijóo, “cos sectores primarios abandonados a súa sorte”.
Para Méndez Romeu a forma de recuperar o goberno de
Galicia pasa pola unidade interna do partido: “Veño a convidar a todas as
persoas para dar un paso ao fronte e comparecer diante da sociedade co mellor
que temos, o capital humano. Vamos a abrir o partido á xente, a falar coas
persoas e a escoitar con humildade para empezar a construír con eles a resposta
aos seus problemas”.
O candidato aclarou que “son unha persoa de consenso e de
diálogo, pero tamén son unha persoa de goberno, de levar a cabo os obxectivos
marcados”.
José Luis Méndez Romeu rematou a súa intervención
asegurando que: “É o momento, temos a forza e a convicción de que somos quen de
afastar ao goberno do PP”. Tamén fixo referencia ao carácter galeguista do
PSdeG-PSOE por moitas razóns, entre elas, as de defender os intereses de
Galicia cando e onde sexa necesario.
Mareas
Preguntado polos medios de comunicación sobre as últimas
declaracións do Secretario Xeral do Partido Socialista, Pedro Sánchez, sobre as
Mareas amosouse satisfeito porque “ratifica, punto por punto, o que levo
dicindo dende o día que anunciei a miña candidatura. Estamos diante de gobernos
en España e en Galicia que se limitan a facer postureo, en cambio os gobernos que dirixe o Partido Socialista
executan as políticas sociais que necesitan os cidadáns. Agardo que dende este
momento toda a organización socialista galega asuma esta posición política como
a posición de toda organización e que actúe en consecuencia”.
Leiceaga e
Caballero
Sobre o pacto entre Leiceaga e Caballero declarou que ten
o máximo respecto polos dous, “pero creo que nun proceso de eleccións primarias
non pode haber un mercado de votos. Os votos non son unha mercadoría propiedade
de ningún candidato. Eu busco o apoio, cara a cara, de cada afiliado, de cada
militante, en toda Galicia, e non se me ocorrería de modo algún transformar iso
nun paquete, nunha bolsa que pode ser intercambiada a cambio de non se sabe moi
ben que”.
Méndez Romeu destacou que en
todo caso eles teñen liberdade plena para seguir actuando así, e serán os
militantes, o sábado, os que decidan co seu voto. Departamento de comunicación