PSdeG
Leiceaga: "Nestas eleccións moitos pasarán do voto da rabia ao voto da razón"
Vilalba.- O candidato do PSdeG á
Xunta de Galicia, Xoaquín Fernández Leiceaga, reivindicou hoxe en Vilalba “as
propostas realistas” e “cuantificables” do PSOE e de Pedro Sánchez fronte ao “pensamento
máxico” de Rajoy e Pablo Iglesias nesta campaña. Leiceaga censurou que Rajoy
prometa agora baixar os impostos e aumentar o gasto tras catro anos de inmobilismo,
mentres Iglesias “promete de todo sen preocuparse pola factura”, porque “xa
aparecerán sós” os ingresos. “Isto é fume e irresponsabilidade, e xa é hora de
tratar aos cidadáns con respecto”, dixo.
O socialista, que esta mañá presentou xunto con Pilar
Cancela o Decálogo de medidas para o
impulso económico de Galicia do PSdeG, cre que os votantes son “moi
intelixentes” e “nestas eleccións moitos pasarán do voto da rabia ao voto da
razón” e apostarán polo “cambio solvente” que representan os socialistas. O
candidato á Xunta resaltou especialmente en Vilalba as medidas que os
socialistas galegos lle esixen ao Goberno central para o medio rural e o sector
lácteo incluídas no decálogo.
Nesta
liña foi tamén a intervención do cabeza de lista ao Senado por Lugo, Ricardo
Varela, que denunciou a complicidade do Goberno de Galicia e de España coas
industrias e as distribuidoras para baixar os prezos do leite, facendo
inviables as explotacións. Varela dixo que a Xunta, “por activa e por pasiva”,
está consentindo que centos de explotacións gandeiras de Galicia teñan que
pechar por falta de viabilidade, xa que os prezos do leite están por debaixo
dos custes de produción. “O que esta facendo a administración é ningunear aos
gandeiros”, afirmou.
O
candidato ao Senado comprometeuse a que se o vindeiro presidente do Goberno é
Pedro Sánchez os socialistas porán en marcha “unha mesa de negociación onde
estean presentes a Administración Central, a Autonómica, as industrias, os
distribuidores e os produtores, para conseguir un acordo que garanta como
mínimo os custes das explotacións das granxas. E tamén poremos en marcha unha
renda familiar básica para os períodos de baixada de prezos”.
Varela
dixo que as vindeiras eleccións son importantes para darlle un cambio de timón
a este país. “Hai que evitar a gran coalición do 2 de marzo, entre o PP e
Podemos, que impediu o Goberno do cambio en España”. Comunicación PSdeG-PSOE