PSdeG

Leiceaga: “España e Galicia non están por aventuras e queren un cambio con garantías, o do PSOE”

Xoaquín Fernández Leiceaga, candidato do PSdeG á presidencia da Xunta, manifestou onte no mitin de peche de campaña en Ourense que nas eleccións do domingo “non tendes que elixir entre votar por medo ou votar por rabia; votade por conviccións, coa cabeza e co corazón! Que non vos enganen!”.

“O domingo temos o futuro dunha xeración nas nosas mans, que non vos enganen! non tedes que votar inmobilismo nin aventuras, votade pensando nos vosos; polo futuro, polas becas e polas pensións”, asegurou Leiceaga, nun mitin no que tamén interviron os candidatos ao Congreso e o Senado por Ourense Rocío de Frutos e Luis García Mañá.   
“Que non vos enganen! Non estades entre a espada e a parede, non tendes que elixir entre Iglesias ou máis Rajoy, votade polo único cambio seguro, firme e responsable. Votade PSOE e votade por Pedro Sánchez”, engadiu o candidato á Xunta, que considerou que “o Brexit é o exemplo do resultado que produce o inmobilismo da dereita máis o populismo”.   

“Ao final desta campaña temos dúas certezas: que Rajoy non vai ser presidente, porque non é quen de dialogar e acadar acordos con ninguén, e que España e Galicia non están por aventuras e queren un cambio con garantías, o do PSOE”, engadiu Leicega, que rematou lamentando que “en Galicia temos a Feijóo, alumno avantaxado de Rajoy, e a En Marea, que antepuxo os desexos de poder de Iglesias aos intereses dos galegos”. Comunicación PSdeG-PSOE