Editoriais e empresas de artes gráficas crean o Clúster do Produto Gráfico e do Libro Galego

Editoriais e empresas de artes gráficas de Galicia uniranse para crear o Clúster do Produto Gráfico e do Libro Galego. Esta asociación, presentada en Santiago, constituirase o vindeiro 20 de marzo na capital galega, segundo anunciou en rolda de prensa o presidente da Asociación de Empresarios de Artes Gráficas de Galicia (AEAGG), Jacobo Bermejo. A fin desta iniciativa é crear unha nova organización empresarial galega na que participe o sector gráfico, publicitario e editorial, así como proveedores de equipamento e tecnoloxía. Bermejo confiou en que esta nova agrupación parta con 50 empresas nun principio. Grazas ao Clúster, as empresas integradas compartirán recursos para a formación, innovación e internacionalización do sector, e procurará acordos de colaboración para acadar prezos máis competitivos. Ao tempo, servirá para canalizar as axudas procedentes da Administración e a crear proxectos de asistencia a feiras internacionais. Bermejo explicou en rolda de prensa que o Clúster nace cunha vocación de "reivindicar a imaxe de Galicia no deseño". O presidente da Aeagg salientou a calidade dos traballos gráficos e editoriais galegos e salientou o crecemento por riba da media estatal destes sectores en Galicia, tanto en número de empresas, como en facturación e emprego. O Clúster nace despois de que a Asociación de Empresarios de Artes Gráficas de Galicia (Aeagg) comezara en xuño un estudo de viabilidade financiado pola Consellería de Industria.