ELECCIÓNS GALEGAS
Leiceaga aposta por unha "Galicia audaz"
O candidato socialista á presidencia da Xunta, Xoaquín Fernández Leiceaga,
interveu hoxe no Forum Europa, Tribuna Galicia, onde presentou as liñas mestras
do seu programa económico para a Xunta de Galicia. Apostou por unha “Galicia
audaz” que combine o crecemento económico co respecto á estabilidade orzamentaria.
“Fronte á Galicia da resignación e das ideas curtas –dixo-, propoño unha
Galicia que mire máis lonxe e que pise máis forte, que voe para gañar o seu
futuro” da man do proxecto socialista que ofrece “solidez, estabilidade e
capacidade”, tal e como avala a xestión socialista “alá onde gobernamos”.
Ofreceu unha “guía para que a economía e a sociedade poidan navegar pola senda
da converxencia con España e a UE, a través dunha folla de ruta específica”.
Fernández Leiceaga presentou a proposta socialista para “xerar máis riqueza
e máis oportunidades nos sectores con futuro económico”, cun proxecto económico
centrado nunha “nova política económica, unha administración pública moderna e
eficiente e o impulso da axenda social”.
Así, a política económica centrarase na creación de emprego a través da
reindustrialización e a innovación, con propostas para superar a parálise
actual do Igape, desmantelado por Feijóo ata o punto de reducir o seu orzamento
nun 75 por cento e, tan só executar o 35 por cento do escaso orzamento
restante.
Propuxo neste sentido reformar a fondo o Igape, desenvolver un novo plan
galego de I+D+i e crear o Instituto Galego de Investigación Aplicada seguindo o
exemplo do Ikerbasque ou o Icrea catalán.
Tamén anunciou un plan de emprego dotado con 100 millóns de euros para garantir
a contratación de 10.000 mozos e mozas ao ano, unha tarifa plana de 50 euros
para o primeiro ano de actividade dos autónomos, un Plan de Retorno do Talento
con 10 millóns anuais e un Plan de Relevo Xeracional para que anualmente 500
xóvenes adquiran a experiencia de autónomos a piques de xubilarse.
Estabilidade orzamentaria
O candidato socialista comprometeuse cunha xestión “con moita máis
execución e menos débeda” que a de Feijóo, que deixa unha Galicia “moito máis
endebedada”, pasando de 3.381 millóns de euros en 2009 aos 10.727 millóns, máis
que triplicando o endebedamento que atopou á súa chegada, comprometendo a marxe
de acción de calquera goberno futuro sen que teña suposto ningunha mellora no
crecemento de Galicia.
Fernández Leiceaga comprometeuse a desenvolver unha acción de goberno
“financeiramente sustentable” e asegurou que as medidas incluídas no programa
económico do PSdeG están baseadas nunha “análise seria e rigorosa dentro das
posibilidades orzamentarias da Xunta”.
O proxecto socialista “fuxe de aventuras” para conseguir crecemento
económico “mantendo o compromiso coa regra de gasto e coa estabilidade
orzamentaria”. Asegurou que o seu obxectivo é “aproveitar as marxes que permite
a Lei porque queremos unha Xunta financeiramente sostible”. Departamento de comunicación