Galicia, en Iberflora 2016
Os
representantes das empresas galegas presentes en Iberflora 2016 fan unha
valoración moi positiva da súa estadía neste certame, que se clausura hoxe en
Valencia e que está considerado o referente do sector en España. De feito, o
stand de Galicia foi dos máis demandados. Así llo transmitiron á directora
xeral de Gandaría, Agricultura e Industrias Agroalimentarias, Belén do Campo,
quen estivo na feira apoiando a presenza galega.
10 empresas galegas
En total
foron 10 as empresas da nosa Comunidade que participaron como coexpositoras no
espazo da Xunta de Galicia, de 416 metros cadrados de superficie. Delas, 4
están situadas no concello pontevedrés de Tomiño (Viveros Brotes, Coplant
Galicia, Viveros Juan Peixoto e Veraleza), no que se localiza boa parte
da produción galega de planta ornamental. O resto das expositoras foron Viveros Cabaleiros (Lourenzá), Viveros Denoy (Arzúa), Fomento Vegetal (Ribadeo), Hifas da Terra (Pontevedra), Plant Plus (Narón) e Ullaplant (A Estrada). Entre os países
que mostraron un maior interese pola nosa produción destaca o Reino Unido,
seguido de Francia.
Estas
empresas teñen unha clara orientación internacional, xa que unha media do 48%
da súa facturación ven dada pola exportación. Empregan preto de 500 persoas,
entre os traballadores dos viveiros e os comerciais e acadan unha facturación
anual duns 15.500.000 euros.
Dentro deste
sector, Galicia destaca como a maior produtora de camelia de Europa e noutras variedades
–como hortensia, rododendro, azalea, abelia, acivro e coníferas de peche– a
nosa comunidade é das maiores produtoras de España.
A feira Iberflora está considerada o principal referente
deste sector en España. Nesta edición número 45 rexistrou un total de 444
firmas expositoras, das cales 342 son españolas e as restantes 102
internacionais, procedentes na súa maior parte de Alemaña, Francia, Italia,
Reino Unido, Países Baixos e Portugal. A superficie da mostra situouse preto
dos 60.000 metros cadrados