O modelo Sogama, avalado pola Unión Europea

En resposta ás declaracións efectuadas por Adega  no día de hoxe respecto do modelo Sogama, esta entidade pública quere manifestar que: 

1.- No complexo medioambiental de Sogama en Cerceda  só se tratan dúas fraccións de residuos: os envases contidos na bolsa amarela (latas, briks e envases de plástico), que a entidade clasifica por tipoloxías para ser remitidos aos centros recicladores, e o lixo en masa integrado na coñecida como bolsa negra. No último caso, e malia que esta só debería albergar a parte non reciclable dos refugallos, o certo é que os cidadáns, ben por descoñecemento, por erro ou por falta de concienciación, aínda seguen a depositar nos contedores verdes convencionais materiais susceptibles de ser reciclados (aceiro, aluminio e vidro), que a compañía, cun gran esforzo técnico e logístico, clasifica para propiciar o seu posterior reciclado. 

2.- Neste escenario, é preciso recordar que Sogama non xestiona nin vidro, nin papel/cartón, nin pilas, nin residuos especiais procedentes dos puntos limpos nin tampouco comerciais. Estas fraccións teñen a súa propia vía de tratamento a través de xestores autorizados e, a diferenza do que veñen facendo outras plantas, non son computadas no seu balance empresarial. 

3.- Non é Sogama quen ten que cumprir as porcentaxes de reciclado establecidas pola normativa vixente para o ano 2020, senón España no seu conxunto. Trátase dun traballo colaborativo entre as Administracións, as plantas de tratamento, os cidadáns e os propios colectivos sociais, como é o caso das organizacións ecoloxistas. Todos, sen excepción, teñen que contribuír a que no 2020 se poida reciclar no noso país o 50% dos residuos producidos. 

4.- O incremento da reciclaxe constitúe unha prioridade para a Sociedade Galega do Medio Ambiente, de aí que este mesmo mes fará pública a adxudicación da ampliación do seu complexo medioambiental, actuación que permitirá tratar no mesmo, e de forma óptima, o conxunto dos residuos producidos nos concellos adscritos ao seu modelo. Desta forma, aumentarase a capacidade da infraestrutura nun 81%, ao pasar das 550.000 toneladas nominais a 1.000.000. A remodelación da nave actual de reciclaxe, tratamento e elaboración de combustible e a posta en marcha dunha nova planta para a clasificación dos envases e o papel/cartón contidos no lixo convencional garantirá a súa maior achega ao reciclado, cifrada en 120.000 toneladas anuais. 

5.- Tamén constitúe unha prioridade para a empresa a redución do vertido, pretendendo chegar ao vertido técnico cero. Desde o ano 2008, reduciu nun 55% o depósito de refugallos no vertedoiro de Areosa, e no 2015 só desviou a esta instalación o 25% dos residuos. O obxectivo é destinar a vertedoiro, única e exclusivamente, a parte do lixo que non se poida reciclar nin valorizar material e/ou enerxeticamente. 

6.- O incremento da valorización enerxética tamén foi significativa o pasado ano (un 4,40% máis que en 2014 e un 29,12% máis que en 2008), pasando a ser a súa planta termoeléctrica a máis eficiente e a de maior produción das 10 destas características existentes en España. 

7.- E neste punto cabería precisar que Sogama non é unha planta incineradora, senón unha planta de valorización enerxética (VE). Así se recolle no certificado R1 da UE, que define os límites mediante os cales unha planta clasifícase nunha ou outra modalidade, presentando Sogama o índice  máis alto de España en termos de VE . 

8.- Aos 24 postos de traballo que operan no edificio de oficinas de Sogama,  hai que engadir aproximadamente os 329 que acollen as empresas subcontratistas que operan nas instalacións da empresa, e que contan con distintos perfís profesionais, e da orde de 500 empregos indirectos, contribuíndo a xerar riqueza en Galicia. 

9.- No ano 2012, a Comisión Europea realizou un estudo ex post do proxecto Sogama, cuxos resultados destacaron os altos beneficios que a actividade da empresa xerara para Galicia, tanto desde a dimensión ambiental como económica e social. Enxalzou así o peche dos vertedoiros ilegais e a adopción dunha tecnoloxía de valorización enerxética respectuosa co medio ambiente e a saúde, a creación de emprego, a contribución ao mercado da reciclaxe e o desenvolvemento do capital humano. O informe é público e atópase a disposición dos interesados en http://ec.europa.eu/rexional_policy/sources/docgener/evaluation/pdf/projects/sogama_galicia.pdf. 

Así mesmo, o proxecto Sogama recibiu unha subvención de máis de 72 millóns de euros procedentes do Fondo de Cohesión, sendo o único de España que superou o correspondente sistema de control do Parlamento Europeo aplicable aos Fondos de Cohesión sen ser unha gran infraestrutura de comunicación. Todo isto fai concluír que Sogama atópase no camiño correcto: o da sustentabilidade, e cun horizonte claro e perfectamente definido, o da economía circular. Departamento de comunicación